Трамп испраќа федерални сили во Чикаго и Албукерки
СН/агенции
23 јули 2020
Претседателот на САД ја исполнува својата закана и испраќа федерални полициски единици во други поголеми градови. Засегнатите градоначалници гледаат маневар за одвлекување на вниманието од неуспесите на самиот Трамп.
Фотографија: Reuters/L. Millis
Реклама
Американскиот претседател Доналд Трамп изјави дека федералните сили ќе бидат распоредени во градовите во кои доаѓа до пораст на насилството, меѓу кои се Чикаго во Илиноис и Албукерки во Њу Мексико.
Трамп на брифингот во Белата куќа за порастот на насилствата ги обвини левичарските движења кои сакаат да ја расформираат и да ја укинат полициската управа по смртта на афроамериканецот Џорџ Флојд.
„Ова дивеење на насилството ја шокира совеста на нашата нација“, изјави Трамп, пренесува агенцијата Ројтерс.
Според американскиот министер за правда, Вилијам Бар, околу 200 федерални полицајци сега треба да бидат испратени во Чикаго, Илиноис, а уште 30 во Албукерки, Њу Мексико. Според Бар, 200 федерални полицајци се веќе во Канзас Сити, Мисури.
Класична борба против криминалот?
Според Бар, операциите се дел од програмата „Операција Легенда“, која веќе трае, и затоа се одвоени од неодамнешно контроверзно распоредување на федерални безбедносни сили во Портланд. Федералните власти ќе „разоткриваат убиства и ќе разбиваат насилни банди“, рече Бар. „Ова е класична борба против криминалот“. Во „Операцијата Легенда“, федералните власти од ФБИ и други агенции, според него соработуваат со локални власти.
Фотографија: AFP/M. Trinca
Група од 15 градоначалници од големите американски градови ја повикаа федералната влада моментално да ги повлече своите сили и да „се согласи да не ги распоредува унилатерално службениците на федералната полиција во американските градови“.
Градоначалниците во отворено писмо до министерот Бар и до вршителот на должноста министер за внатрешна безбедност Чад Волф им порачаа дека едностраните одлуки на федералната влада да испратат сили во американските градови се „без преседан и ја кршат фундаменталната уставна заштита“.
Протести против колонијализмот и расизмот
Антирасистичките протести по смртта на Афроамериканецот Џорџ Флојд го подгреаја конфликтот околу колонијализмот. Во Европа и САД се оштетуваат, уништуваат и отстрануваат споменици.
Во изминатите години имаше повеќе конфликти околу статуата на Едвард Колстон во Бристол. Сега демонстрантите го извадија споменикот од неговиот постамент и го фрлија во пристаништето. Колстон работел за Кралско-африканската компанија, која поробувала 5000 луѓе годишно. Подоцна влегол во историјата како филантроп поради неговите донации за училишта и болници.
Активисти го обвинуваат иницијаторот на извидничкото движење Роберт Баден-Пауел за расизам, хомофобија и восхитување со Адолф Хитлер. Неговата статуа се наоѓаше во Браунси, во јужна Англија. По уништувањето на првите споменици во текот на антирасистичките протести, локалната власт во знак на претпазливост самата ја отстрани статуата на Баден-Пауелс.
Фотографија: picture-alliance/dpa/A. Matthews
Леополд Втори и белгискиот колонијален режим
Во Белгија има многу статуи на кралот Леополд Втори. Монархот кој владеел со земјата од 1865 до 1909 година, во Конго создал брутален колонијален режим, кој важи за еден од најнасилните во историјата. Повеќе статуи на Леополд Втори беа испрскани со боја. Оваа, во предградието на Антверпен, Екерен, беше транспортирана во музејскиот магацин од страна на властите.
Фотографија: Reuters/ATV
Кристофер Колумбо – помеѓу почит и презир
И во САД се разгоре судир околу спомениците на контроверзни личности. Гневот на демонстрантите е насочен, меѓу другото, против Кристофер Колумбо. Оваа статуа на морепловецот во Бостон, остана без глава. Домородците во северна Америка го отфрлаат оддавањето чест на Колумбо, поради тоа што велат дека неговите експедиции овозможиле колонизација на континентот и геноцид на индигените народи.
Фотографија: Reuters/B. Snyder
Контроверзно сеќавање: Статуа на Колумбо во Чиле
Колумбо за некои е една од најзначајните личности во светската историја, за многу луѓе во Латинска Америка, меѓутоа, неговото име се поврзува со почеток на ера на страдања. Од аспект на индигените народи, шпанскиот колонијализам е темно поглавје во нивната историја. И во Латинска Америка во минатото се уништувани и оштетувани статуи на Колумбо.
Фотографија: picture-alliance/dpa/B. Boensch
Џеферсон Дејвис во визир на демонстрантите
Џеферсон Дејвис бил претседател на Конфедеративните држави на Америка и еден од водечките политичари во Граѓанската војна. Статуата на Дејвис сега е испрскана со боја и откорната. Ненси Пелоси, спикер на Претставничкиот дом во САД, пледира за отстранување на статуите на претставниците на Конфедеративните држави. Овие луѓе застапувале „свирепост и варварство“, изјави демократката Пелоси.
Фотографија: Getty Images/C. Somodevilla
Роберт Ли ја подели Америка
И оваа статуа на Роберт Ли, генерал на конфедеративната армија во американската граѓанска војна, би требало да биде отстранета. Во Ричмонд, во американската сојузна држава Вирџинија, споменикот ќе биде отстранет по налог на гувернерот Ралф Нортам. Многу Афроамериканци во статуите на политичарите и војниците од Конфедеративните држави на Америка гледаат симболи на угнетување и ропство.
Фотографија: picture-alliance/AP Photo/S. Helber
7 фотографии1 | 7
„Политички трик“ на Трамп
Градоначалникот на Чикаго, Лори Лајтфут, ја нарече најавата на Трамп „политички трик“. Според неа Трамп само сака да го одвлече вниманието од неговиот „неуспех“ во борбата против пандемијата на коронавирусот. Ако Трамп навистина сака да стори нешто за борбата против урбаното насилство, тој , на пример, треба да се заложи за построг закон за оружје на федерално ниво. „Нему му е сеедно. Нему му е апсолутно сеедно", рече таа, додавајќи дека претседателот е само заинтересиран да си помогне самиот себеси и да ги направи другите лоши. Во врска со случувањата во Портланд, Орегон, Лајтфут рече дека она што се случи таму откако беа распоредени федералните власти не е демократија: „Тоа го нарекуваме тиранија и диктатура“.
