Американскиот амбасадор во Германија на состанок со шефовите на автомобилската индустрија порачал дека претседателот Трамп ќе ги суспендира тарифите за автомобилите од ЕУ, доколку се укинат истите и за возилата од САД.
Фотографија: picture-alliance/dpa/I. Wagner
Реклама
Според сознанијата на германските медиуми, амбасадорот Ричард Гренел им пренел на првите луѓе на Дајмлер, Фолксваген и БМВ дека претседателот на САД, Доналд Трамп им нуди трампа со која и двете страни ќе бидат ослободени од давачки.
Минатиот месец Трамп се закани дека ќе наметне давачки од 20 проценти на сите возила произведени во ЕУ, со што би можел да и нанесе сериозен удар на европската автомобилска индустрија која е присутна на американскиот пазар.
Весникот „Ханделсблат“ ги цитира присутните на состанокот кој се одржал во просториите на американската амбасада во Берлин во средата. Сите три компании чии шефови биле присутни на состанокот одбија да ја коментираат неговата содржина.
Портпаролка на германското министерство за економија исто така одби да го коментира извештајот, со став дека споровите со САД поврзани со трговијата се во надлежност на Европската комисија во Брисел.
И во Европската Комисија одбија да го коментираат случајот. Оттаму велат дека претседателот на ЕК, Жан Клод Јункер на оваа тема ќе разговара со американскиот претседател Трамп во Вашингтон на крајот на месецов.
Во моментов, САД имаат увозни тарифи за автомобили од ЕУ во висина од 2,5 проценти и на камиони од 25 проценти. ЕУ, од друга страна, ги царини американските возила со 10 проценти.
Трамп веќе им воведе царини од 25 проценти на ЕУ, Канада и Мексико за увоз на челик и 10 проценти на алуминиум на почетокот на јуни годинава.
ЕУ се реваншираше со зголемување на царините на повеќе американски производи на 25 проценти, меѓу другото и за челик, алуминиумски производи, земјоделски производи, текстил и дури и мотори.
Протекционистичката политика на Трамп која е насочена и кон увозот од Кина, драматично ги зголеми стравувањата од трговска војна која би можела да ѝ наштети на светската економија.
Германците и нивните автомобили
Без оглед на скандалот со дизел горивото, автомобилите се дел од германскиот национален идентитет. Но колку е навистина длабока љубовта на Германците кон пријателите на четири тркала?
Удар за автомобилската индустрија
Репутација на славните германски автопроизводители доживеа голем удар, но продажбата и натаму расте. Сепак, германските брендови сочинуваат помалку од две третини од сите возила на германските патишта. Притоа се работи за чисто машка „територија“: само една третина од сопствениците на возила во 2017 година се жени. Интересно, таа бројка воопшто не се промени во последната деценија.
Фотографија: picture alliance/dpa
Една деценија на пат
Германските патнички возила, полека старееја, од 8,1 година во просек пред една деценија, до највисокиот просек во историјата од 9,7 години во 2017. Патем, Германија воопшто не е во светскиот врв според возила по глава на жител. Таа е на 20 место - 17 места зад САД, каде на секои десет жители има осум автомобили. Најмалку моторизирана земја во светот е Того.
Земја на олдтајмери
Околу 600 илјади возила - околу 13 проценти од сите возила на германските патишта се сметаат за олдтајмери, што значи дека се постари од три децении. Околу 380 илјади имаат историски регистерски таблички кои се добиваат доколку се докаже дека возилото е сочувано со оригиналната состојба.
Фотографија: Imago/imagebroker/friederich
Постепена моторизација
На 1 јануари 2017, во Германија беа регистрирани 45,8 милиони патнички возила. Во однос на населението од 82,8 милиони, тоа значи дека има 684 автомобили на илјада жители. Денес, има пет пати повеќе автомобили во земјата отколку пред половина век, кога беа регистрирани околу 9 милиони возила.
Во земјата на БМВ
Просечната старост на возилата во Германија варира од покраина до покраина. Веројатно не е изненадување што во Баварија, домот на БМВ и покраина со најголем приход по глава на жител, просекот на старост на возилата е најмал. Просечната старост на возилата на патиштата во Бранденбург, покраината околу Берли, надминува една деценија.
Фотографија: picture alliance/dpa/A. Gebert
Германија заостанува
Иако бројот на возила на бензин остана стабилен во последната деценија, нивниот удел се намали на две третини од сите мотори во 2017. Бројот на дизел возила порасна од 10 на 15 милиони од 2008 наваму. Електричните и хибридните возила комбинирано сочинуваат само 0,5 проценти, или вкупно 200 илјади. Во Норвешка уделот на електричните возила е повеќе од 1 процент.
