Севернокорејскиот властодржец Ким Јонг Ун останува омилен противник на претседателот на САД. По речиси помирливите тонови, Доналд Трамп сега повторно го заострува тонот.
Фотографија: Reuters/J. Ernst
Реклама
САД повторно ја ставија Северна Кореја на листата на земји-поддржувачи на тероризмот. Ова требаше да се случи пред неколку години, изјави претседателот на САД, Доналд Трамп за новинарите во Белата куќа. Овој потег овозможува да се наметнат дополнителни казнени мерки против комунистичката земја. Од друга страна, потегот во голема мерка е симболичен, бидејќи САД веќе масивно ја санкционираат Северна Кореја. Какви новите казнени мерки ќе бидат воведени против Пјонгјанг ќе објави Министерството за финансии на САД во текот на денешниот ден.
Тензиите меѓу Северна Кореја и САД се интензивираа во последниве неколку месеци по неколку ракетни и нуклеарни тестови на меѓународно изолираната земја.Двете страни си упатија бројни закани и засилено користеа воена реторика. Според сопствените наводи, Северна Кореја работи на проектили кои можат да достигнат до копнената територија на САД.
Јапонија го поддржува планот мерки
Јапонија ја поздрави одлуката на Трамп. „Го поздравуваме и го подржуваме овој потег, бидејќи треба да го зголеми притисокот врз Северна Кореја", изјави за новинарите јапонскиот премиер Шинзо Абе во Токио. Според неговиот министер за одбрана, Егонури Онодера, сепак, нови провокации на Северна Кореја не може да се исклучат. Јапонија е директно загрозена од ракетните и нуклеарните тестови на Северна Кореја. Неодамна, соседната земја тестираше два проектили кои ја прелетаа Јапонија.
За што е способна севернокорејската армија?
Северна Кореја повторно го привлекува вниманието на светската јавност. Тестирањето на интерконтиненталните ракети наидува на остри критики. Земјата има една од најголемите армии во светот. Но, продолжува да се вооружува
Фотографија: Reuters/KCNA
Меѓу најбројните армии во светот
Севернокорејската армија има 700 илјади војници и околу 4,5 милиони резервисти. Речиси секој петти жител на земјата е во војска. Сите мажи во комунистичкиот режим мораат да учествуваат во воената обука. Поради тоа, Северна Кореја има двојно повеќе војници од соседната Јужна Кореја.
Фотографија: Getty Images/AFP/E. Jones
Различни воени орудија
Според податоците наведени во Глобалниот индекс за вооружување, Северна Кореја во 2017 година располага со 76 подморници, 5.025 тенкови и 458 борбени авиони. На оваа фотографија од 2013 година, лидерот Ким Јонг Ун е сликан во командната централа на армијата.
Фотографија: picture-alliance/dpa
Воена парада
Севернокорејскиот режим секоја година ја демонстрира својата сила на воена парада во главниот град Пјонгјанг. Парадите воглавно се одржуваат за време на некој важен јубилеј на комунистичката земја или семејството Ким.
Фотографија: picture-alliance/dpa/KCNA
Интерконтинентални ракети
САД во четвртокот потврдија дека Северна Кореја успешно тестирала балистичка интерконтинентална ракета. Ракетата од типот „Хвасонг- 14“ е во состојба да ја погоди секоја цел во светот, јави државната новинска агенција КЦНА.
Фотографија: Getty Images/AFP/KCNA
Атомските проби продолжуваат
И покрај острите санкции, Северна Кореја продолжува со својата атомска програма. Само во 2016 година беа извршени пет нуклеарни проби. Јужнокорејскиот министер за одбрана Хан Мин Ко смета дека соседот наскоро ќе го изврши и шестиот тест.
Фотографија: picture-alliance/dpa/KCNA
Закана за светскиот мир
Кина и Русија се единствените земји кои се водат како сојузници на Северна Кореја. Режимот за главен непријател ја смета „империјалистичката сила САД“. Меѓу непријателите уште спаѓаат и Јужна Кореја и Јапонија.
Фотографија: Reuters/K. Hong-Ji
Крај на трпението?
По тестирањето на интерконтиненталните ракети на американското трпение му дојде крајот. Претседателот на САД, Доналд Трамп сака да најде решение со своите сојузници од Г20. Кина и Русија, во секој случај, сакаат да спречат американски напади врз воени цели во Северна Кореја.
Во меѓувреме, специјалниот пратеник од Пекинг веќе ја заврши посетата на главниот град на Северна Кореја. Двете страни разговарале за прашања од „заеднички интерес", меѓу кои и „ситуацијата на Корејскиот полуостров", јави кинеската новинска агенција Ксинхуа. Дали специјалниот претставник се сретнал со владетелот Ким Јонг Ун, остана нејасно.
