Американскиот претседател се повинува на јавниот притисок и ја смени политиката на раздвојување на мигрантските семејства на границите. Во иднина родителите и децата ќе одат заедно во затвор.
По жестоката критика од земјата и од странство, американскиот претседател Доналд Трамп направи драстично свртување во курсот во важен дел од својата миграциска политика. Во иднина, родителите кои стигнуваат илегално преку јужната граница, нема да бидат раздвојувани од своите деца, за што претседателот вчера потпиша декрет. Праксата на разделување на децата од родителите беше критикувана од Демократската партија, но и во самата партија на претседателот, Републиканската. Во дебатата со критики се вклучија и папата Франциско, како и владите на Германија и на Велика Британија.
„Станува збор за тоа семејствата да бидат заедно, а од другастрана да се погрижиме да имаме моќна и солидна граница“, изјави Трамп при потпишувањето на декретот во Белата куќа. Тој му дал налог на својот министер за правда за соодветна промена на регулативата. Трамп сепак останува на својата политика на „нулта толеранција“, според која секој нелегален влез преку мексиканско-американската граница претставува кривично дело.
Од владини извори се вели дека Трамп осознал дека раздвојувањето на семејствата прераснува во растечки политички проблем. На промена на праксата инсистирала и неговата сопруга Меланија. Вчерашната одлука е една од ретките при кои Трамп отстапува од својот тврд став. Тој во предизборната кампања вети цврста доселеничка политика и градење ѕид на границата кон Мексико заради спречување на илегалната миграција.
Од почетокот на мај американските власти разделиле преку 2340 деца од нивните родители на границата кон Мексико. Децата се сместувани во прифатни центри, додека нивните родители се во затвор. Трамп за ситуацијата ги обвинуваше опозиционите Демократи, иако во двата дома од Конгресот Републиканската партија има мнозинство.
Граница САД-Мексико: Бетон наместо челик
Ѕидот на границата со Мексико ќе се гради. Американскиот претседател Доналд Трамп потпиша соодветен декрет. На делови од границата веќе има ограда. Дали сега челикот ќе биде заменет со бетон?
Фотографија: Reuters/J. L. Gonzalez
Трамп има искуство со градење
„На нашата јужна граница ќе изградам голем ѕид. Никој не гради ѕидови подобро од мене и за тој ѕид ќе плати и Мексико.“ Тоа американскиот претседател Доналд Трамп го изјави во текот на кампањата. Досега тој градеше пред сѐ висококатници и хотели. Ѕидот на границата е на прво место на неговиот план од 10 точки во делот на политиката на доселување.
Фотографија: picture-alliance/AP Photo/C. Torres
Крај кој завршува „нигде-никаде“
Границата меѓу САД и Мексико е долга околу 3.200 километри. Од нив со жица се обезбедени околу 1.100 километри. Границата минува низ четири американски и шест мексикански сојузни држави, минува низ пустина и големи градови. Поради лошата пристапност, еден мал дел од границата во Њу Мексико е отворен. На други места пак патролираат службеници за заштити на границата.
Фотографија: Reuters/M. Blake
Несовладлив челичен џин
Бројот на илегални доселеници во САД се проценува на околу 350.000 годишно. Голем дел од нив доаѓаат од Мексико. Дел од доселениците од Мексико се толерираат. Од друга страна, мексиканските семејства не добиваат виза. Доселениците си посакуваат подобар живот, работа и повеќе пари за своите семејства.
Фотографија: picture-alliance/dpa/A. Zepeda
Само мал допир
Семејствата живеат разделени со ограда. Прегратка не е можна. Во најдобар случај низ челичните шипки може да се протне рака. Ако Доналд Трамп го оствари најавеното, тогаш наместо челик овде ќе има бетон. Тогаш и мал допир нема да биде можен.
Фотографија: picture-alliance/ZumaPress/J. West
Од изолација до предрасуди
„Кога Мексико праќа луѓе, тогаш не ги испраќа најдобрите“, рече Трамп во текот на кампањата. „Испраќа луѓе кои прават многу проблеми. Тие носат дрога, злосторства, силувачи. Некои, би рекол, се и добри луѓе.“ Трамп сака да ги протера илегалните доселеници, барем оние кои се со криминално досие. Сепак, и покрај заканите, многу Мексиканци не се откажуваат од своите планови за бегство во САД.
Фотографија: picture-alliance/AP Photo/G. Bull
Пустина, граница и назад
За некои Мексиканци сонот завршува на границата. Тие завршуваат в затвор. Други за илегално минување преку границата плаќаат со својот живот. Медиумите критикуваат дека безбедносните сили пукаат преку границата. Дури во 2015 година за тоа првпат е обвинет припадник на американската погранична служба.
Фотографија: Reuters/D.A. Garcia
Со сачмарка против непожелните гости
Џим Чилтон, американски фармер, во патрола низ својот имот. Неговата фарма на површина од 200.000 квадратни метри на југоистокот од Аризона граничи директно со Мексико. Помеѓу има само бодликава жица. Чилтон се смета себеси лично одговорен за безбедноста и одвреме-навреме посега по сачмарката.
Фотографија: Getty Images/AFP/F.J. Brown
Чуден крај
„Тортиља ѕид“ е потценувачкиот назив на 22,5 километри долгиот дел од границата меѓу Отеј Меса Бордер Кросинг во Сан Диего (Калифорнија) и Пацификот. Оградата завршува во водата. За да се побегне на другата страна е доволно само да се исплива околу оградата.
