Трамп тврди дека видел докази за потеклото на коронавирусот
Мартин Кох
1 мај 2020
Американскиот претседател Доналд Трамп тврди дека видел докази оти коронавирусот потекнува од кинеска лабораторија. Тој ја обвини кинеската влада дека потфрлила, а се нафрли и на СЗО.
Фотографија: Reuters/C. Barria
Реклама
Американскиот претседател Доналд Трамп вели дека „видел докази“ за поврзаност на коронавирусот со Институтот за вирологија во кинескиот град Вухан. „Да, видов“, рече Трамп пред новинарите во Белата куќа, но на потпрашање додаде и дека не може да изнесува други детали.
Раководителот на лабораторијата во Вухан, Јуан Жиминг, уште пред неколку дена ги демантираше ваквите и слични тврдења.
Прашан во врска со извештаите дека во судирот околу потеклот на коронавирусот би можел да ги запре платежните обврски кон Кина, Трамп одговори дека би можел да воведе „казнени царини“. Тој тоа веќе го стори во трговскиот конфликт со Кина.
Трамп уште еднаш се нафрли и врз Светската здравствена организација. Тој ја спореди СЗО со „ПР-агенција за Кина“. „Тие не треба да се извинуваат кога луѓето ќе направат ужасни грешки. Тие треба за тоа да се срамат“, рече Трамп, кој во корона-кризата го запре плаќањето за СЗО.
Американскиот претседател не сакаше да ги коментира наводите на канцеларијата на директорот на Националната разузнувачка служба дека тајните служби, исто како и најголемиот дел научници, сметаат дека новиот коронавирус е природен и не е произведен од човек или генетски модифициран. Трамп рече дека не ја видел ваквата изјава и додаде дека има многу теории и во САД се истражува потеклото. „Ќе пронајдеме“, нагласи тој.
Кои животни го пренесуваат коронавирусот?
Неодамнешна студија открива дека мачките можат да бидат заразени со Ковид-19, и можат да им го пренесуваат вирусот на други животни- во лабораторски услови. Кај другите домашни животни, ризикот е помал.
Фотографија: picture-alliance/F. Herrmann
Да се галат или не?
Истражувачите на Ветеринарниот институт Харбин во Кина открија дека коронавирусот може да се пренесува меѓу мачки. Домашните мачки исто така можат да го пренесуваат вирусот натаму на други животни, но тоа не е лесно, вели Хуалан Чен, водечки истражувач во студијата која беше објавена во журналот "bioRxiv" на 31 март годинава.
Фотографија: picture-alliance/dpa/K-W. Friedrich
Без грижа
Но нема потреба од паника меѓу сопствениците на мачки, затоа што тие не се заразни долго време. Сепак, сопствениците на мачки со хронични болести, или постарите, треба привремено да ги ограничат контактите доколку мачките слободно го напуштаат домот. Здравите луѓе треба да ги мијат рацете откако ќе ги погалат.
Фотографија: picture-alliance/imageBroker
Кучињата се безбедни
За разлика од мачките, вирусот не може лесно да се реплицира кај кучињата, тврдат истражувачите. Оттука, слободно шетајте го и негувајте го вашиот пес.
Фотографија: DW/F. Schmidt
Кој кого заразува?
Оваа домашна свиња која шета низ улиците на Рим не треба да се плаши од кучиња. А и кучето нема потреба да стравува од својот забрефтан ривал. Ветерираните тврдат дека свињите не се сметаат за природен резервоар за коронавирусот.
Фотографија: Reuters/A. Lingria
Карантин за ласиците
Кај овие цицачи од групата Мустилида состојбата е поинаква. Хуалан Чен ги истражувал и ласиците и утврдил дека и тие го шират Ковид-19, исто како и мачките. Ширењето меѓу животните се случува преку респираторни капки. Истражувачите го пронашле вирусот во брисеви земени од грлото и носот на ласиците, но не откриле инфекција на белите дробови.
Научниците велат дека нема никаква опасност за одгледувачите на живина, како овој трговец во Вухан, Кина, каде беше откриен првиот случај на коронавирусот. Луѓето немаат за што да се грижат затоа што кокошките се практично имуни на Ковид-19, како и патките и другите слични видови.
Фотографија: Getty Images/China Photos
Кога луѓето се опасност за животните
Луѓето можат да се заразат од животни, но се случува и обратното. Четиригодишната малајска тигрица Надја од Зоолошката градина во Њујорк имаше позитивен тест на коронавирусот „Ова е првпат диво животно да се зарази од Ковид-19 од човек“, изјави главниот ветеринар на Зоолошката Пол Кале.
Фотографија: Reuters/WCS
Дали лилјаците се неправедно обвинети?
Лилјаците се сметаат за најверојатно преносници на Ковид-19, но ветеринарите веруваат дека во декември 2019 некое друго животно се јавило во Вухан како посредник меѓу нив и луѓето. Можеби ласиците или мачките?
Панголините се под сомнеж дека го пренесуваат вирусот. Истражувачи од Хонг Конг, Кина и Австралија го откриле вирусот во малезискиот панголин кој имал големи сличности со оној забележан кај човекот.
