По масакрот во училиштето на Крим регионалната управа се сомнева дека напаѓачот имал помагачи. „Задачата е да се утврди кој го подготвил за ова злосторство“, изјави шефот на владата на Крим, Сергеј Аксјонов, на местото на злосторството во Керч. „Тука тој дејствувал сам...Но при подготовката, според моето и мислењето на моите колеги, овој подлец не можел да биде сам“, изјави Аксјонов.

Денеска утрината почина едно повредено девојче, јавија новинските агенции повикувајќи се на болнички извори. Со тоа бројот на загинати се искачи на 20. Меѓу загинатите има 11 малолетници, соопшти пак министерката за здравство на Русија Вероника Скворцова. Таа додаде дека тинејџерите кои биле во критична состојба сега се стабилни.

Во нападот со ловечка пушка во колеџот во градот Керч повредени се уште 44 лица и сите се задржани во болница.

Според наводите на руските истражители, нападот го извршил 18-годишен ученик во колеџот кој пукал околу себе со пушка и детонирал најмалку една експлозивна направа. Тој во медиумите е опишан како срамежлив осаменик. Мотивот на напаѓачот, кој се самоубил на местото на злосторството, засега не е познат. На Крим е прогласена тридневна жалост.