Тројца косовски Срби уапсени за убиството на Ивановиќ
ЖА / агенции
23 ноември 2018
Тројца косовски Срби, од кои двајца полицајци, се уапсени денеска во врска со убиството на косовскиот политичар Оливер Ивановиќ, кое се случи во јануари годинава.
Фотографија: Getty Images/AFP/A. Nimani
Реклама
Во северниот дел на Косовска Митровица рано утрово специјалните полициски сили уапсиле тројца косовски Срби, соопшти косовската полиција, а по уште еден осомничен се трага.
Уапсените се осомничени во врска со убиството на Оливер Ивановиќ, кој на 16. јануари оваа година беше застрелан пред неговото биро во Митровица, а неговиот убиец не беше идентификуван. 64-годишниот косовско-српски политичар се сметаше за умерен и еден од ретките кои можеа да посредуваат помеѓу српското малцинство и албанското мнозинство во Косово.
Ивановиќ исто така беше голем поборник на сузбивање на криминалот во српскиот дел од Митровица. Многумина во неговото опкружување ја застапуваат теоријата дека оние кои ги влечеле конците во атентатот потекнуваат од криминалното милје и дека убиството нема ништо заедничко со политичкиот конфликт во градот.
Косовската полиција исклучително ретко интервенира во северниот, српски дел на поделениот град Митровица. Во акцијата денеска било уапсено уште едно, четврто лице, кое не е поврзано со атентатот врз Ивановиќ, но се обидело да им се спротистави на специјалците, соопшти полициски портпарол.
Апсењето се случува во ектот на нови тензии меѓу Приштина и Белград, кој има големо влијание врз српските општини во Косово и по прогласувањето на косовската независност во 2008. година. Србија до денес уште не го признава Косово за самостојна држава.
По веста за апсењето во Митровица, српскиот претседател Александар Вучиќ денеска свика состанок на надлежните безбедносни служби. Српскиот политички лидер во Митровица, Игор Симиќ, апсењето на косовските Срби го опиша како брутално и го повика локалното население на протести.
Во меѓувреме косовскиот премиер Рамуш Харадинај апелираше до населението да остане мирно, уверувајќи дека полициската акција не е поврзана со никакви политички настани.
Србија и Косово: 15 погледи на „внатрешниот дијалог“
Уставот на Србија вели: „Покраината Косово и Метохија е составен дел на територијата на Србија...“ Уставната рамка главно ја игнорира политичката стварност. Уличните призори зборуваат за расположението во земјата.
Фотографија: DW/D. Dedovic
Српскиот „ѕид на плачот“
Српските граѓани веќе навикнаа на тоа зградата на парламентот да се порабува со лица на загинати и грабнати луѓе во „Вториот косовски бој“. Овој жичен ѕид е отстрануван повеќепати, но тој повторно се појавува како обвинување на сметка на Западот и албанските герилци.
Фотографија: DW/D. Dedovic
Лицата обвинуваат
Лицата на киднапирани Срби од 1989/1999 година служат како главен аргумент за обвинувања на сметка на Северноатлантскиот Сојуз и Европската Унија.
Фотографија: DW/D. Dedovic
Меѓу Косово и Крим
Моден детал со политички некоректна русофилска формула на белградската пешачка зона. Туристите од Запад радо го купуваат бизарниот сувенир.
Фотографија: DW/D. Dedovic
Руска алтернатива
Борис Тадиќ во предизборната кампања во 2008 година го ифрли слоганот „И Косово и Европа“. Овој графит одговара на очекуван начин.
Фотографија: DW/D. Dedovic
Таблоидите србуваат
Острите политички пароли на ѕидовите можеби станаа поретки затоа што сѐ повеќе врескаат насловите на таблоидните печатени производи.
Фотографија: DW/D. Dedovic
Браќата Шпанци
Шпанскиот е популарен во Белград. Не толку во училиштата за странски јазици, колку во „Немањина“ улица, во близина на Министерството за надворешни работи.
Фотографија: DW/D. Dedovic
Срце и аритмии
Додека еден белграѓанин се обидува да пронајде нешто корисно во отпадот, од ѕидот го бодри позната крилатица.
Фотографија: DW/D. Dedovic
Кој не е со нас е против нас
Фудбалскиот сојуз на Србија попусто се бунеше против одлуката на УЕФА од мај 2016-та за прием на Косово како полноправна членка. Одлуката е конечна од почетокот на 2017-та.
Фотографија: DW/D. Dedovic
ЕУ како империја
Космет всушност е кратенка (Косово и Метохија). Во зборот „Евробска“ се сокрила придавката „робска“.
Фотографија: DW/D. Dedovic
Вдахновение во премин
Плод на патриотско-поетско вдахновение на ѕидот на премин меѓу главната и една споредна улица во Лексовац.
Фотографија: DW/D. Dedovic
На КиМ со благослов
Дел од уличните призори во градовите се и повиците за обиколка на манастирите и на српските општини на Косово, со благослов на црковните власти.
Фотографија: DW/D. Dedovic
Римување, некому стравување
Опомена за српската политичка елита, доколку некој случајно помислува на некаков вид признавање на косовската независност.
Фотографија: DW/D. Dedovic
Урнатини кои опоменуваат
Своевиден споменик кој со својата наказност во градскиот пејсаж потсетува на бомбите кои во 1999 година ги испрати НАТО.
Фотографија: DW/D. Dedovic
Албанци кои се сакаат
Актерската легенда Беким Фехиу од 2010 година (кога си го одзеде животот) не е меѓу живите белграѓани, но неговата книга и натаму е хит во излозите на белградските книжарници.
Фотографија: DW/D. Dedovic
Трунка надеж
Повеќето графити на улиците сепак се тематски надвор од „внатрешниот дијалог“. Можеби најрадикалните пароли се преселени на социјалните мрежи.
