Тукушто ги потрошивме ресурсите на Земјата за годинава
29 јули 2019
Заклучно со денеска човештвото ги потроши сите расположиви ресурси на Земјата како вода, почва и чист воздух за 2019 година. Годинава тоа се случува најрано откако се мерат ресурсите во последните 20 години.
Фотографија: Reuters/NASA
Реклама
Доколку продолжи актуелното трошење на ресурсите, ќе бидат потребни 1,75 Земји за да се задоволат потребите на човештвото годинава, покажува студијата на Глобалната мрежа Отпечаток која секоја година го одбележува Денот кога се надминуваат ресурсите на Земјата. Годинешниот датум кога се потрошени ресурсите е најраниот откако е започнато мерењето пред 20 години. Во последните 20 години тој се поместил за два месеци.
„Фактот што годинава Денот се случува на 29 јули значи дека човештвото во моментот ја користи природата за 1,75 пати побрзо одошто екосистемот на Планетата може да регенерира“, соопшти еколошката група со седиште во Калифорнија.
„Трошоците на ова глобално претерано еколошко трошење стануваат евидентни во форма на уништување на шумите, ерозија на почвата, загуба на биодиверзитет, и таложење на јаглерод диоксид во атмосферата. Последното води и кон климатски промени и зачестени екстремни временски настани“.
За споредба, во 1993 година, Денот беше одбележан на 21 октомври, во 2003 на 22 септември, а во 2017 на 2 август.
„Имаме само една Земја- тоа е дефинирачкиот контекст на човековото постоење. Не можеме да користиме 1,75 Земји без уништувачки последици“, изјави Матис Вакернагел, основач на еколошката мрежа.
Природните катастрофи видени од вселената
Како сателитите ја гледаат Земјата? И што откриваат за она што се случува на планетата? Погледнете ги овие импресивни фотографии на природни катастрофи, видени од вселената.
Фотографија: NASA
Ѕверот се разбуди
Без разлика колку долго „спијат“, вулканите секогаш се во лошо расположение кога ќе се разбудат. Меѓународната вселенска станица го снимаше регионот на Курилските острови во Русија, кога еруптираше вулканот Саричев во 2009 година. Дупката меѓу облаците овозможи да биде направена оваа фотографија. Не постои природен феномен кој не може да се набљудува од вселената.
Фотографија: NASA
Остана само пустина
Секојдневното набљудување на Земјата од вселената овозможува да се следат и климатските промени. Фотографиите (од лево кон десно) снимени во април 2014, јули 2015 и јануари 2016 нудат јасна слика на постепеното исчезнување на езерото Попо, некогаш второто најголемо езеро во Боливија, делумно и како резултат на климатските промени.
Фотографија: ESA/Belspo
Не си играјте со оган
Секоја година, пожарите ги уништуваат природата и животната средина во многу земји во светот. Пречесто, тие се предизвикани од човекот. Таков беше случајот и со Индонезија, каде фармерите ги палат дождовните шуми за да обезбедат плодна почва. На Борнео и Суматра сателитите открија големи пожари во септември 2015, а облакот од сив чад предизвика и големо загадување на воздухот.
Фотографија: NASA/J. Schmaltz
Големата поплава
Во Германија, родителите ги плашат децата дека доколку не јадат - ќе врне. И навистина, во 2013 врнеше толку многу што најголемите реки во централна Европа се излеаја од своите корита. Како што се гледа од оваа фотографија од 2013, Елба се излеа од коритото по големите дождови. Заматените води го прекриваат регионот околу Витенберг во покраината Саксонија Анхалт.
Фотографија: NASA/J. Allen
Во окото на ураганот
Силните бури можат да предизвикаат огромни штети. Информациите од вселената овозможуваат прецизно да се следат тие бури: нивната јачина, правецот, брзината... Во регионот на источниот Пацифик, во близина на Мексико, сателитските снимки го утврдија точното движење на тропската бура Сандра која се движеше со 160 километри на час во ноември 2015 година.
Фотографија: NASA/J. Schmaltz
Топење на глечерите
Сателитите играат клучна улога во следењето на климатските промени и процесот на топење на ледената обвивка. Од вселената, научниците успеаја да го документираат топењето на повеќе глечери, како и зголемувањето на морското ниво. Оваа фотографија, снимена од Меѓународната вселенска станица, го покажува повлекувањето на глечерот Упсала во аргентинска Патагонија од 2002 до 2013 година.
Фотографија: NASA
Запрете со дишење!
Во септември 2015 сателитите ја снимија оваа импресивна фотографија од Блискиот Исток обвиткан од песочна бура, т.н. хабуб, која погоди повеќе населени региони. Она што сателитите го забележуваат во вселената потоа се пренесува на сензорите кои го мерат квалитетот на воздухот на земјата, а тоа ги подобрува и метереолошките прогнози.
Фотографија: NASA/J. Schmaltz
„Голата планина“
Со овие зборови НАСА го објасни недостатокот на снег на планината Шаста во Калифорнија, основен извор на вода за целиот регион. Фотографиите кои ја документираат сушата од изминатите години постојано покажуваат кафеави планини кои всушност треба да бидат бели од снег. Паралелно со топењето на мразот, се проширува сушата.
