Тројца турски дипломати побарале азил во Германија по неуспешниот обид за пуч во Турција, меѓу нив веројатно и воениот аташе во турската амбасада во Берлин, јавуваат „Зиддојче цајтунг“, НДР и ВДР, повикувајќи се на извори во германската влада. Дипломатите од страна на Анкара се осомничени дека се блиски до движењето на Ѓулен, кое турската влада го обвини за пучот.

Тешките билатерални односи со тоа би можеле да бидат ставени на нова проба, затоа што Германија мора да донесе одлука дали барателите на азил, кои од страна на Анкара се осомничени како пучисти, би биле во Турција изложени на политички прогон. Турската влада ја поништи важноста на пасошите на осум дипломати во Германија. Портпарол на турската амбасада изјави: „Точно е дека дел од дипломатите се повикани назад во Турција.“

Сојузната служба за миграција и бегалци (БАМФ) сѐ уште не донесла одлука по барањата за азил, се вели во Берлин. Не е потребно да се брза, со оглед на фактот дека дипломатите се заштитени од протерување сѐ додека постапката е во тек.

Од обидот за пуч на средината од јули турската влада уапси 32.000 луѓе, поради наводни врски со движењето на исламскиот проповедник Фетула Ѓулен, кое е обвинето за пучот. Од служба се суспендирани илјадници војници, полицајци, службеници во министерства, како и наставници и доценти. Уапсени се и голем број критички настроени новинари и научници. Критичарите ја обвинуваат владата дека го користи воениот пуч како покритие за да ги замолчи своите противници.