Во германскиот главен град е уапсено лице поврзано со Анис Амри, кој со камион изврши напад врз божиќниот пазар во Берлин пред девет дена.
Фотографија: picture-alliance/rtn/P. Wuest
Реклама
Девет дена по извршениот напад врз божиќниот пазар на Брајтшајдплац во Берлин, полицијата во германската престолнина уапси лице кое било поврзано со осомничениот атентатор Анис Амри. Уапсениот е 40-годишен Тунижанец од Берлин, како што соопшти Сојузното обвинителство од Карлсруе. Истражителите од Сојузната криминалистичка служба врз основа на налог за претрес го пребарале станот и деловните простории на Тунижанецот.
Бројот бил најден во телефонот на Амри
Телефонскиот број на уапсеното лице бил најден во мобилниот телефон на Амри, пронајден на местото на нападот, соопшти Сојузното обвинителство, пренесувајќи ги сомневањата дека уапсениот можеби бил инволвиран во нападот. Дали претпоставките ќе се потврдат, останува да открие истрагата.
При нападот со товарен камион врз божиќниот пазар на Брајтшајдплац во Берлин на 19 декември беа убиени 12 луѓе. Се претпоставува дека Амри го украл камионот и свесно со него влетал во толпата луѓе. Терористичката организација Исламска држава ја презеде одговорноста за атентатот.
Фотографија: picture alliance/dpa/Italian Police
Неколку од жртвите се од странство
Меѓу жртвите се наоѓаат и повеќе странци од неколку земји, како што се дознава од кругови на истрагата. Покрај Германци, загинаа една Италијанка, една Израелка, еден Полјак, еден Украинец и еден Чех. Многу странци има и меѓу вкупно 55-те повредени луѓе.
Четири дена по нападот, италијанската полиција го застрела осомничениот напаѓач во Милано при рутинска контрола, откако тој отворил оган врз полицајците. Француските медиуми јавуваат дека Амри веројатно од Германија во Франција дошол преку Холандија. Од францускиот град Лион тој потоа отпатувал кон Милано. Холандската полиција сѐуште ги испитува укажувањата, а германската истрага не ги коментираше овие тврдења.
Хронологија: терористички заговори во Германија
Во неколку наврати во последните 18 месеци, полицијата успеа да спречи терористички напади и заговори во Германија. Земјата стана цел на исламските милитанти во Европа. Ова се досегашните обиди
Фотографија: Reuters/M. Rehle
Лајпциг, октомври 2016
Полицијата во Лајпциг го уапси 22-годишниот сириски бегалец Џабер ал Бакр по дводневна потрага откако беше откриен експлозив и опрема за производство на бомби во неговиот стан во Кемниц. Беше осомничен за планирање напад врз аеродромот во Берлин. Два дена подоцна, беше пронајден обесен во затворската келија.
Фотографија: picture-alliance/dpa/S. Willnow
Ансбах, јули 2016
Во јули годинава, „Исламската држава“ ја презеде одговорноста за два напади извршени од баратели на азил. 15 луѓе беа повредени во вински бар во близина на влезот на музички фестивал во баварскиот град Ансбах, откако сириски бегалец активираше бомба. Напаѓачот загина во атентатот.
Фотографија: picture alliance/AP Photo/D. Karmann
Вирцбург, јули 2016
17- годишен барател на азил вооружен со секира и нож изврши напад во регионален воз кај Вирцбург. Пет лица беа тешко повредени, а напаѓачот беше застрелан од полицијата. Германските власти соопштија дека тинејџерот бил осаменик инспириран од „Исламската држава“, но не бил член на мрежата.
Фотографија: picture-alliance/dpa/K. Hildenbrand
Диселдорф, мај 2016
Три осомничени членови на „Исламската држава“ беа уапсени во три германски покраини. Власатите велат дека двете лица планирале да се разнесат со експлозив во центарот на Диселдорф, додека третиот напаѓач и четврто лице кое беше уапсено во Франција, планирале да отворат оган врз случајните минувачи.
Фотографија: picture-alliance/dpa/M. Hitij
Есен, април 2016
Полицијата уапси три лица откако бомба повреди три лица во храм на Сиките во Есен. Бомбата беше активирана по свадбена прослава, уништувајќи ја внатрешноста на објектот. За нападот е осомничен 16- годишник кој и се предаде на полицијата, додека уште еден малолетник беше уапсен во неговиот дом.
Фотографија: picture-alliance/dpa/M. Kusch
Хановер, февруари 2016
Германката со мароканско потекло Сафиа С. е обвинета за напад со нож врз полицаец на главната железничка станица во Хановер. Оваа 16- годишна девојка била мотивирана од „членови на Исламската држава во Сирија да го изврши нападот“, вели јавниот обвинител Симон Хенрикс.
Фотографија: Polizei
Берлин, февруари 2016
Во неколку одвоени рации низ државата, полицијата уапси тројца Алжирци осомничени за врски со „Исламската држава“ и за планирање терористички напади во Берлин. Покраинското јавно обвинителство вели дека постоеле „конкретни“ планови за напад во главниот град.
Фотографија: Reuters/F. Bensch
Оберурсел, април 2015
Локалната велосипедска трка беше откажана откако полицијата откри дека е можна цел на исламски терористички напад. Еден 35-годишен маж со турско потекло и неговата 34-годишна сопруга беа уапсени под сомнение дека планирале напад. Во нивниот дом полицијата пронајде материјал за изработка на бомби.
