Учениците до трето одделение во училиште, останатите oнлајн
БГ
18 август 2020
Министрите за здравство и образование денеска го претставија планот за почетокот на учебната година во услови на пандемија на коронавирус. Во училишните клупи ќе седнат децата од прво до трето одделение, останатите дома.
Фотографија: P. Stojanovski
Реклама
Учениците до трето одделение ќе можат физички да следат настава, доколку така одлучат нивните родители, додека сите останати ќе ја започнат школската година онаму каде што ја завршија- во своите домови. Министрите за здравство Венко Филипче и образование Арбер Адеми денеска го претставија планот за новата учебна година кој предвидува и исклучоци, во зависност од епидемиолошката состојба со коронавирусот и желбата на родителите.
„И покрај тоа што крајна цел на Владата беше учениците да се вратат во училишните клупи, мора да бидеме максимално свесни и внимателни за да се намали ризикот од ширење на вирусот и да се зачува здравјето на населението“, рече Филипче.
Начелно, во училиште ќе можат да одат децата од 1 до 3 одделение, а во случај нивниот родител да не се согласува со тоа, алтернативно ќе можат да следат настава и од дома, онлајн.
Ковид-19: Импровизирани прегради за безбеден училишен ден
01:04
This browser does not support the video element.
Одлуката да им се дозволи на овие деца да посетуваат настава, според министерот Филипче, се должи на истражувањата кои покажале дека кај нив има најмала инциденца на зараза со ковид-19, тие се асимптоматски и со лесна клиничка слика.
И децата над трето одделение ќе имаат можност физички да следат настава доколку општините го побараат тоа.
„По барање на општините, а во согласност со епидемиолошката состојба, ќе се разгледуваат барањата за реализација на наставата со физичко присуство и за тоа ќе се одлучува дополнително, за секоја општина одделно“, рече министерот Адеми. Таква можност, во прв ред, ќе добијат училиштата со мал број ученици и паралелки.
Во оние паралелки каде ќе се одвива настава, таа ќе биде ограничена на 20 ученици, кои ќе треба да носат маски и да одржуваат растојание од 1,5 метри.
Децата од социјално загрозени семејства ќе добијат компјутери од владата.
Корона: Училишна настава со пречки
Во многу земји повторно расте бројот на новозаразени со коронавирус. Тоа во светски рамки ги става и училиштата пред големи предизвици. Како различни земји се справуваат со проблемот?
Фотографија: Getty Images/L. DeCicca
Тајланд: Настава зад пластична преграда
Околу 250 ученици од училиштето „Ват Клонг Тој“ во Банкок мораат за време на часовите да седат зад пластични прегради. Покрај тоа мора да носат и заштитна маска. Пред секоја училница се наоѓа мијалник и сапун, апарати за мерење температура се поставени на училишниот влез. Строгите мерки покажуваат резултати: од средината на јули во училиштето нема нови инфекции.
Фотографија: Getty Images/L. DeCicca
Германија: Почеток на учебната година со заштитни маски
Учениците во Основното училиште „Петри“ во Дортмунд се пример за начинот на кој со пандемијата се справува најбројната германска сојузна покраина-Северна Рајна Вестфалија. Во сите училишта важи обврска за носење маска. За разлика од останатите 15 покраини, тука маска мора да се носи и за време на часовите. Какви ќе бидат последиците, не може да се процени, учебната година започна на 12. август.
Фотографија: Getty Images/AFP/I. Fassbender
Палестина: Училиштата конечно отворени
И во ова училиште во Хеброн во Западниот Брег, околу 30 километри јужно од Ерусалим, повторно почна настава. Исто така со обврска за маски, а во некои случаи и гумени ракавици. Радоста на наставничката поради почетокот на учењето е забележлива, без оглед на маската. Училиштата во Западниот Брег беа затворени од март. Хеброн се сметаше за епицентар на заразата со коронавирус.
Фотографија: Getty Images/AFP/H. Bader
Индија: Настава преку разглас
Посебна понуда во ова училиште во селото Дандвал во западната индиска држава Махараштра: на учениците кои немаат пристап кон интернет, им се нуди еден вид дополнителна настава за да го надокнадат пропуштеното. Учениците часовите ги одржуваат на отворено, наставниците им се обраќаат преку разглас, со претходни снимки. Оваа индиска држава беше посебно силно погодена од заразата со коронавирус.
Фотографија: Reuters/P. Waydande
Конго: Без измерена температура, нема училиште
Надлежните во престижниот кварт Лингвала во главниот град на државата, Киншаса, сериозно ги сфаќаат мерките за сузбивање на пандемијата на коронавирус. На секој ученик кој ќе стапне во училишниот двор на училиштето „Отец Ким“, прво му се мери телесната температура. Постои обврска за носење маска.
Фотографија: Getty Images/AFP/A. Mpiana
САД: Рекорден број регистрирани со коронавирус
И во САД мерењето телесна температура спаѓа во секојдневниот ритуал на учениците како една од мерките за сузбивање на коронавирусот. Земјата е тешко погодена од корона-кризата, има најголем број починати како последица на Ковид-19.
Фотографија: picture-alliance/Newscom/P. C. James
Бразил: Прегратка за намалување на маките
Маура Силва е наставничка во училиште во западниот дел од Рио де Жанеиро, кон кое гравитираат најголемите сламови на милионската метропола. За барем малку да ја намали болката на своите штитеници, таа развила еден вид „престилка за прегрнување“. Овде е во домашна посета на еден свој ученик и му помага да навлече пластични ракавици пред да може да го прегрне.
