Бугарија нема намера да ја промени позицијата за Северна Македонија до крајот на годинава и нема да одобри почеток на преговори со ЕУ. Ова е позицијата на техничката влада во Софија утврдена на седницата во средата. 
„Бугарија ќе се придржува до декларацијата на Народното Собрание од 10 октомври 2019 година во врска со проширувањето на ЕУ“, соопштија од владината прес-служба во Софија.
Македонскиот министер за надворешни работи Бујар Османи деновиве изјави дека се уште постои надеж дека бугарскиот став ќе се смени до одржувањето на Советот за општи работи на ЕУ на 14 декември. 
Но, официјална Софија смета дека, засега, само Албанија е подготвена да ги започне преговорите за членство, и покрај тоа што Европската комисија и неколку поголеми земји-членки на ЕУ сметаат дека двете балкански земји треба да останат во пакет. 

„За Бугарија, одлучувачки останува основниот принцип на сопствените заслуги на секој кандидат. Бугарија верува дека Албанија е подготвена за напредок на патот кон ЕУ, и постои подготвеност да се поддржи усвојувањето на преговарачката рамка за земјата и одржувањето на првата Меѓувладина конференција“, соопшти техничката влада во Софија. 

Петков бара шест месеци за преговори 

Надежите на официјално Скопје дека новата влада на технократот Кирил Петков, која треба да биде избрана деновиве, би можела да ги помрдне работите од мртва точка се исто така на „стаклени нозе". Петков, имено, во интервју за германскиот магазин Шпигел во вторникот оцени дека ќе бидат потребни шестмесечни преговори за да се дојде до решение.
„Треба да формираме работни групи и да им дозволиме да работат шест месеци, за да не бидат само националистите на обете страни тие што ги носат одлуките.“
„Давањето зелено светло за почеток на преговорите сега, без дискусија, само ќе ги зајакне националистите на обете страни“, рече Петков за Шпигел.