Уште пет заболени од коронавирус, границите се затвораат
БГ
16 март 2020
Министерот за здравство Венко Филипче информира дека е потврден Ковид-19 кај уште 5 пациенти, додека за уште двајца ќе се извршат дополнителни тестирања. Со одлука на Влада, границите целосно се затвораат.
Фотографија: DW/P. Stojanovski
Реклама
Пет нови лица заболени од коронавирус се откриени во земјава, додека двајца кои имале позитивен резултат на приватна клиника, дополнително ќе бидат тестирани на државната Клиника во Скопје во вторник (17.03.) Владата вечерва ги заостри мерките за борба против коронавирусот со одлука за целосно затворање на сите граници, вклучително и аеродромот во Скопје.
„Денеска имаме пет нови позитивни пациенти и двајца дијагностицирани во друга лабараторија кои треба да се потврдат утре во нашата лабораторија“, изјави Филипче вечерва на прес-конференција.
Четворица од новорегистрираните случаи се од Дебар и се инфицирале од двајцата првозаразени од овој град. Петтиот е случај е македонска државјанка која во земјава пристигнала од Холандија, преку Виена, пред четири дена, но во меѓувреме била во самоизолација. Се контактираат членовите на нејзиното семејство, возачот на таксито кое ја донело од скопскиот аеродром до дома, како и уште 31 лице кое патувало со неа во авионот.
Денеска започна, а утре ќе продолжи, масовно тестирање на граѓаните на Дебар. Филипче спомена бројка од 50 до 80 луѓе кои ќе бидат опфатени со овој скрининг.
Во изолација поради коронавирус? Нема проблем
Со малку креативност можете да ја претворите изолацијата во инспирација. Еве неколку идеи како да го искористите времето во карантин, и да продолжите нормално да живеете дури и затворени во четири ѕида.
Фотографија: picture-alliance/dpa/P. Schickert
Бидете креативни со конзервираната храна
Претворањето на конзервираната храна во нешто вкусно можеби бара малку магија, но сигурно не е невозможно. На пример, експериментирајте со лакса која ги прочистува синусите или пак измешајте конзерва туна со малку пченка и свеж ѓумбир за да го зајакнете вашиот имунолошки систем.
Фотографија: Miguel Medina/AFP/Getty Images
Затворената вежбална не е изговор
Имате доволно начини да ја одржите добрата форма на вашето тело дури и ако не можете да ја посетите вашата вежбална. Загрејте го телото со фитнес вежби или јога со онлајн упатства, а доколку ви е многу здодевно искористете ги и конзервите со храна во вашиот магацин за да ги развиете вашите бицепси и трицепси.
Фотографија: picture-alliance/dpa/K.-D. Gabbert
Време е за пролетно чистење
Искористете ја можноста, засукајте ги ракавите и употребете го вишокот енергија за да го светнете секое ќоше во домот. Ова може да биде најдобриот момент за расчитување на нередот. Можете дури и да ослободите место во плакарите и да зачистите во подрумот.
Целодневното гледање на ТВ серии е гарантиран начин за опуштање на умот и телото. Можеби мини-серијата „Чернобил“ и не е најдобриот избор доколку сте во мрачно расположение. Алтернативата би било нешто полесно, како „Пријатели“. Доколку секој ден потрошите 6 часа и 20 минути на оваа серија, ќе ги изгледате сите 236 епизоди за 14 дена.
Покрај сето слободно време можеби е добар момент да ја избришете прашината од некои постари игри и да се забавувате со оние со кои го споделувате карантинот. Доколку сте сами во изолација, повеќе класични игри денес имаат и онлајн верзии па можете да играте со пријателите преку интернет.
Фотографија: picture-alliance/dpa/S. Stache
Научете нешто ново
Во денешно време можете да научите речиси се онлајн. Можеби секогаш сте сакале да научите некоја нова вештина или дури и јазик. Германски можеби? На интернет ќе најдете многу можности и за бесплатно изучување јазици, па со оглед на слободното време, нема никаков изговор зошто тоа да не го сторите.
Фотографија: Colourbox
Јавете и се на бабата
Вашите роднини секогаш се жалат дека ве гледаат само за празници. Сега е добар момент да им се јавите. Иако веројатноста дека ќе заглавите на телефон 1-2 часа е голема, сепак ќе ви се израдуваат. Притоа, ќе покажете грижа и за нив и за нивното здравје во оваа тешка ситуација, особено за постарите луѓе.
Фотографија: Heike Brauer/Fotolia
Планирајте го следниот одмор
Планирањето одмор е добар начин да избегате од вашата соба, макар и само во мислите. Исполнете го денот замислувајќи си како се релаксирате на Бали или уживате во чистиот планински воздух некаде на Алпите. Само не заборавајте да си купите и патничко осигурување бидејќи никогаш не се знае кога ќе дојде следната криза.
Фотографија: picture-alliance/dpa/P. Schickert
8 фотографии1 | 8
Со одлука на Владата се затвораат сите гранични премини во државата за странски државјани, како и скопскиот аеродром. Исклучок од одлуката се товарните возила кои транзитираат, претставници на дипломатскиот кор и други лица за кои МВР ќе даде одобрение. Услугите на аеродромот ќе можат да се користат само за државни, воени, карго, хуманитарни потреби, како и за празни летови.
И шефот на дипломатијата Никола Димитров вечерва апелираше до сите граѓани да не патуваат надвор од земјата, особено со оглед на негативното искуство кое деновиве го имаат бројни македонските државјани кои останаа заглавени на бројни граници во Европа, и особено во поширокиот регион. Тој ги повика и државјаните кои имаат престој во странска држава да не се враќаат во земјата.
