Во нападот кој синоќа на железничката станица во градот Кунминг го извршила група вооружена со ножеви, ранети се повеќе од 130 луѓе, јави кинеската новинска агенција Синхуа. Полицијата убила четворица напаѓачи, а по останатите се трага. Според полицијата, во нападот учествувале најмалку 10 маскирани напаѓачи.

Локалната влада за нападот ги обвини ујгурските сепаратисти од провинцијата Синкјанг, регион во Кина во кој живеат припадници на ова муслиманско малцинство.

Кунминг е неколку илјади километри оддалечен од областа Синкјанг, каде досега вообичаено се случуваа терористичките напади на Ујгурите, кои се залагаат за отцепување од Кина.

Пекинг тврди дека организаторите на нападот се поврзани со радикални муслимански организации во соседните земји.

Во октомври минатата година во Пекинг загинаа пет лица откако на плоштадот Тјананмен автомобил влета во група туристи, а потоа удри во ограда. Загинаа тројца Ујгури, членови на исто семејство, кои се наоѓаа во автомобилот, а повредени беа уште 40 лица. За нападот исто така беа обвинети ујгурските сепаратисти.