Највпечатливите сцени од светските фудбалски првенства: незаборавни моменти, прикажани со малку претерување и хумористично. Херман Аксел, кој потекнува од Аргентина, од 90-тите години на минатиот век се специјализира за фудбалски карикатури и тоа стана негова професија.

„Ја имав среќата и луксузот да можам да живеам од мојата страст - го сакам фудбалот и цртањето. Уште како мал дома во Буенос Аирес постојано играв фудбал, петмина против петмина на теренот. Ќе ме повикаа на телефон и јас веднаш одев да играм“, вели Херман Аксел, карикатурист на фудбалски теми.

Кога Херман Аксел прави карикатура на некој фудбалер, како на пример германскиот репрезентативец Месут Езил, како основа користи што е можно поголем број различни фотографии, а понекогаш и видео-снимки.

„Тој и Рибери ми се двајцата фаворити, оти имаат многу карактеристични елементи на ликот, па се идеални за карикатуристите“, вели Аксел и додава:

„Езил, на пример: кај него прво се - испакнатите очи, потоа уште и шпицестиот нос, како и тесното лице - тоа е идеално за карикатура“.

Херман Аксел објавува карикатури во различни списанија. На почетокот на кариерата работеше за аргентински и бразилски магазини, а денес првенствено за англиското фудбалско списание „ФорФорТу“, односно „ЧетириЧетириДва“, и за германскиот магазин „Браво-спорт“.

„Има различни типови на карикатури, не само типичните, кои прикажуваат едно лице. За англиската ревија ’ФорФорТу‘ илустрирам важни сцени од некој натпревар, кои навистина се случиле, спектакуларни голови како овој на Роберто Карлос. За германските списанија, пак, правам мали стрипови, кои секогаш завршуваат комично; тоа се измислени, но смешни сцени“, вели Аксел.

Идеалниот тим од најдобри играчи на сите времиња, според Херман Аксел би изгледал вака: Пеле, Марадона, Роналдињо и Клинсман - сите заедно во иста екипа. Тој има веќе и посакувано сценарио за финалето на ова светско првенство во Бразил: аргентинскиот репрезентативец Меси во 119 минута ги минува Германците Милер, Езил, Швајнштајгер, Геце, Кедира, Боатенг, Лам и Нојер и потоа со петицата ја втурнува топката во голот.

„Многумина Аргентинци посакуваат финале Аргентина - Бразил, но мислам дека е многу подмолно ако во Бразил Аргентина стане светски првак“, вели карикатуристот.

Дури по финалето на 13 јули ќе се види дали оваа карикатура со Аргентина како светски првак ќе се најде во весниците или сепак ќе остане само како една шега.