Филипче: Не сакаме да дојде до полициски час како во Италија
12 март 2020
Министерот за здравство денеска најави серија нови мерки кои треба да го спречат ширењето на коронавирусот во земјава. Во болници само во итни случаи, во барови и ресторани до 18 часот.
Фотографија: Gov. of North Macedonia
Реклама
Владата планира уште една серија поригорозни мерки со кои треба да се спречи ширењето на коронавирусот во земјава. Заклучно со 24 март се забрануваат сите јавни и приватни собири без разлика на бројот на учесници. Кафетериите, рестораните, казината и обложувалниците ќе работат со скратено време до 18 часот, со преполовен капацитет за гостите. Се откажуваат и сите кино и театарски претстави.
„Искуството од Италија не учи дека треба да бидеме поригорозни во мерките.“ „Апелираме на јавната свест. Во Италија има форма на полициски час и никој не смее да излезе од дома без посебна дозвола. Ние не сакаме да дојдеме дотаму и затоа воведуваме вакви мерки“, рече денеска министерот за здравство Венко Филипче.
До новите мерки треба да се придржуваат и верските заедници, и Филипче им порача дека не треба да ги повикуваат верниците на миси и молитви.
Упатства: Како да се заштитите од коронавирус
Луѓето ширум светот ставаат заштитни маски за дишење за да спречат вирусна инфекција. Сепак, други мерки се поефикасни. Еве неколку совети засновани на упатствата на СЗО.
Фотографија: Getty Images/X. Chu
Подобро од ништо
Не е докажано дека маските за лице можат ефикасно да ве заштитат од вирусни инфекции. Овие маски веројатно се во можност да фатат некои микроби пред да стигнат до устата или носот. Но уште поважно е тоа дека тие ги спречуваат луѓето да ги допираат устата или носот (што повеќето луѓе го прават инстинктивно). Ако веќе сте болни, таквите маски може да спречат да не заразувате други.
Фотографија: Getty Images/Stringer
Дезинфицирајте ги рацете
Во својот список на препораки како да се заштитите од зарази, Светската здравствена организација не споменува маски за лице. На врвот е често миењето на рацете. СЗО препорачува дезинфекциско средство за рацете на база на алкохол, како на фотографијата, кои најчесто ги гледаме во болниците
Фотографија: picture-alliance/dpa/S. Pilick
И сапун и вода ќе завршат работа
Поедноставното секојдневно решение се водата и сапунот, ако ги имате при рака. Но, проверете дали темелно ги миете рацете...
Фотографија: picture alliance/dpa/C. Klose
Кашлање и кивање - но направете го тоа правилно!
Еве што препорачуваат лекарите: Кога кашлате и кивате, покријте ја устата и носот со вашиот подигнат лакот. Или користете книжни марамчиња - но потоа веднаш фрлете го марамчето и измијте ги рацете. А кошулата или џемперот? Не, нив не мора да ги фрлите. Но, перете ги често или однесете ги на хемиско чистење.
Фотографија: Fotolia/Brenda Carson
Стојте подалеку!
Друга препорака која можеби не функционира за сите: Избегнувајте близок контакт со секој кој има треска и кашлица! Ако треба да имате контакт со болни луѓе, погрижете се да преземете дополнителни заштитни мерки.
Фотографија: picture alliance/empics
Имате треска? Одете на лекар, а не на патување!
Ако имате треска, кашлица и отежнато дишење, побарајте лекарска помош навреме. Избегнувајте јавни места за да не ги инфицирате другите. И, исто така, објаснете му на вашиот лекар каде претходно сте патувале.
Фотографија: Reuters/P. Mikheyev
Избегнувајте контакт!
При посета на сточни и зелени пазари во области во кои во моментот има случаи на новиот коронавирус, избегнувајте директен незаштитен контакт со живи животни. Тоа исто така вклучува какви било површини кои се во контакт со животни.
Фотографија: DW
Добро термички обработено - не сурово!
Варете,печете и пржете го месото темелно. Потребно е да се избегне конзумирање на сурови, недоволно термички обработени производи од животинско потекло. Со суровото месо, млекото или животинските органи треба да се постапува внимателно за да се избегне инфицирање од термички необработена храна. Овие се добри практики за безбедност на храната и помагаат да се спречи ширењето на болести.
Фотографија: picture-alliance/Ch. Mohr
8 фотографии1 | 8
Болниците ќе примаат само итни случаи, а на клиниките за Неврохирургија и КАРИЛ се прави прераспределба на кревети и апарати со цел да се зголемат капацитетите за лечење на заразени доколку за тоа има потреба.
Кај тројца од веќе заболените од коронавирус кои се над 65 годишна возраст има влошување на состојбата, а останатите шест се со лесна клиничка состојба, вели Филипче. На Инфективна клиника денеска е донесен пациент кој се вратил од Германија, и за него се чекаат резултатите.
Филипче уште еднаш ги повика компаниите да ги почитуваат препораките за ослободување од работа на вработените кои имаат деца до 10 годишна возраст. Трошоците за тоа, во првичниот период од 14 дена, ќе ги сносат самите компании.
Коронавирус: Колку е пореална заканата, толку повеќе панично купување
