Која тиква да ја земам, се прашува сигурно ова момче во Линколншир, во американската сојузна држава Илиноис. Фенерот од тиква, познат под името „Jack-O-Lantern“ е симбол на Хеловин (31 октомври). Ирските доселеници го донесле обичајот во САД. Денес светлечките изрезбани тикви со страшни ликови ги сакаат најмногу децата - наспроти короната.

Што е подобро од една тиква? Точно, многу тикви! Од околу 6000 тикви во Хемпшир, Велика Британија, за Хеловин е направен вистински мозаик. И, се разбира, огромната мозаик-тиква носи што друго ако не - заштитна маска!

Тиква со маска крената во височините! Во Оринџ Каунти, Калифорнија, овој балон е корона-безбеден: меѓу балонот и посетителите во паркот на земја има повеќе од доволно дистанца.

Добро, Хеловин-декорациите во дворовите честопати се чудни, но токму тоа ги прави интересни. Која е пораката на овој аранжман од виножито, коронавирус, еднорог и човек во заштитна облека во њујоршкиот кварт Квинс, е оставено на секого да заклучи самиот. Можеби гласи „На крајот од пандемијата се’ ќе биде добро, посебно ако веруваме во бајки“?

Како и многу други големи настани, и Хеловин-фестивалот во Маркхем, во Онтарио, Канада, беше откажан поради пандемијата на коронавирус. За разочараните посетители на бали со сено беа нацртани тикви, крава и свиња, се разбира со заштитна маска. Над нив е напишано ветувањето: „We'll bе back“ (Ќе се вратиме).

Во Њу Џерси фановите на Хеловин имаат порака до противниците на маски во своето соседство. Во нивните „Игри со маски“ скелетите кои немаат маски поминуваат лошо. Додека тие се веќе на земја, или одвај се држат на коските, скелетите со маски се во прилично добра состојба. Пораката е недвосмислена.

Зошто на Хеловин да не се отиде во корона-костим? Во продавниците за маски и костими, како оваа во Мексико Сити, годинава има новитети. Корона-маските со боцките изгледаат некако слатко, но сепак кај многу луѓе предизвикуваат ужас. Да се надеваме дека наредната година веќе нема да бидат „ин“!