Коалициските партнери ЦДУ, ЦСУ и СПД преговараат цели 14 часа, а спорни се повеќе работи. Меѓу нив и во каква форма треба да се воведе обврската за плаќање за емисии на јаглерод диоксид. Германската влада сака со пакетот мерки за заштита на климата да ја постигне целта - до 2030 година да го зголеми уделот на еко-енергија на 65%. Во моментов енергијата од обвновливи извори има удел од 38%. И додека политичарите преговараат, пред кабинетот на канцеларката лежи огромен протестен плакат со фотографии на министерката за одбрана и шефица на ЦДУ, Анегрет Крамп-Каренбауер, и на канцеларката Ангела Меркел. На него, во знак на протест против недоволните мерки кои се преземаат досега, стои: „Доста е со трошки“!