Сонцето, чија позиција во пролет е прилично ниска, силно ги осветлува крајолиците и предизвикува цутење на овошните дрвја. Како овде, во Хоенјезар, мало место недалеку од германско-полската граница.

Пролетното будење делува и врз луѓето во германската престолнина. Пркосејќи на сѐ уште ниските температури на водата, за некои и при шест степени на ладните води на Вајзензе почнува сезоната на капење. Некои се надеваат дека со капење во ладна вода ќе ги зајакнат нивните имунолошки сили.

Периодот на цутење на црешите насекаде во светот сигнализира почеток на потопло годишно време. И овде во Потсдам, во новата градина на црквата Свети Никола, едно црешово дрво ја покажува целата своја раскошност.

Привлечни контрасти меѓу овошните цветови и средновековното наследство деновиве во Кведлинбург. Градот стар преку 1.000 години со своите фахверк градби и црквата Штифткирхе од 1994 година спаѓа во Културното наследство на Унеско.

Исто така кон Културното наследство на Унеско припаѓа и градината Десау-Верлитц. Големиот парк е подигнат во втората половина од 18 век. Од 66 метри високата платформа на камбанаријата на црквата Свети Петри (во средината на фотографијата) се пружа поглед на прекрасниот парк и околината.

Во регионот на Алпите преминот од зима кон пролет и лето е прилично видлив. Додека во долината на Оберстдорф веќе цутат кокичиња, на планините во Алгој уште има доста снег.

Југозападниот дел од Германија традиционално е еден од најтоплите региони во земјата. На Боденско Езеро рано се појавуваат пролетните предвесници, како овде во Иберлинген. Тука, недалеку од Алпите, климата доста зависи од ветровите.

Ако се следи течението на Рајна, откако ќе се премине Боденско Езеро, по 500 километри се стигнува до Келн. Градот познат по Катедралата, се наоѓа доста посеверно, па пролетните цвеќиња цутат обично подоцна. Затоа пак пролетното сонце на променадата на Рајна нуди маркантна панорама: со црквата Санкт Мартин, Келнската катедрала и мостот Хоенцоленбрике.

Главниот град на Долна Саксонија поради своите бројни градски паркови се смета за еден од најзелените во Германија. Притоа, во пролет зелената не е секаде доминантна боја, на пример во градината Георген ќе сретнете цело море од цвеќињата наречени сини ѕвезди.

Сигурни, иако не растителни предвесници на пролетта се корпите на плажите на Северно и Балтичко Море. Кога тие ќе бидат извадени покрај морето, летото не е далеку. Оваа година тие, како овде во Санкт Петер Ординг, претставуваат повеќе само ветување - во Германија уште важи локдаун.