Роднините на луѓето кои ја загубија битката со корнавирусот, започнаа во Лондон рачно да цртаат илјадници срца на сивиот ѕид покрај Темза, во близина на зградата на Парламентот.

На т.н. „Национален меморијален ѕид“ треба да настанат речиси 150.000 срца, толку колку што починаа во Велика Британија од почетокот на пандемијата. „Секое срце е индивидуално насликано и единствено, исто како и саканите луѓе кои ги загубивме. А овој споменик ќе биде огромен, сразмерно на големината на нашата колективна загуба“, вели соорганизаторот Мет Фоулер, чиј татко починал од Ковид-19.

Срцата на ѕидот ќе се распростираат во должина од околу еден километар. Организаторите немаат официјална дозвола за проектот, но се надеваат дека властите ќе го толерираат.