Еврокомесарот Јоханес Хан и тројцата пратеници во парламентот на ЕУ кои го придружуваа во Скопје јасно укажале дека единствен излез од кризата е преку почитување на демократските правила и стандарди.
Во интервјуто со Хан, кое преку меѓународната размена го објавува агенцијата Асошиејтед прес, европскиот комесар апелира за почитување на мнозинството.

„Дадовме една сугестија и еден предлог, а тоа е да се почитуваат демократските правила и стандарди кои, патем, се запишани во Уставот и значи дека ако некој има мнозинство за влада, тоа мора да биде почитувано од сите. И почитувано на проактивен начин. Секако дека ќе има дебати, различни погледи на одредени нешта. Се работи за изнаоѓање, се надевам во многу случаи, консензуално решение, но и почитување на мнозинството. Се работи за натамошниот развој на земјата, нејзиното општество, демократското мнозинство, нејзиниот пат кон ЕУ“.

Според Хан, клучот за сите политички актери во земјата е да го следат Уставот.

„Мислам дека е важно да се почитуваат различните етнички групи во земјата, важно е да се живее заедно на мирен и плоден начин. Тоа значи меѓусебно почитување. Разбирливо е различни делови од општеството да имаат различни погледи, но од она што го слушнав денеска, сите се посветени и одлучни да го почитуваат Уставот. Мислам дека е важно да се следи Уставот, и она што е значајно според мене, е владината програма. Тоа е одлучувачки и политичките партии треба да преговараат околу тоа“.