Хитови во 2009 година
4 јануари 201001.01. - 29.01. Katy Perry - Hot N' Cold
Нејзиниот најголем хит досега дефинитивно останува I Kissed A Girl, од албумот One Of The Boys, но и Hot N' Cold не помина ништо полошо. Во 2009 година, четири недели на врвот во Германија. Новиот материјал од Katy Perry можеме да го очекуваме во 2010 година, а албумот ќе биде насловен The B-sides.
30.01. - 05.03. James Morrison ft. Nelly Furtado - Broken Strings
Broken Strings е третиот сингл од вториот студиски албум на James Morisson, насловен Songs for You, Truths for Me. Ова е засега најуспешниот сингл на James Morisson, освојувајќи ги шампионските позиции во повеќето европски земји, меѓу кои и Германија и Швајцарија.
06.03. - 12.03. Silbermond - Irgendwas bleibt
Синглот Irgendwas bleibt беше најава за новиот, трет студиски албум на еден од најуспешните германски бендови, Silbermond. Плочата Nichts passiert излезе во продажба на 20 март и во првата недела од продажбата веќе беше најпродаван албум во Германија, Австрија и Швајцарија.
13.03. - 28.05. Lady GaGa - Poker Face
Критичарите пишуваа дека Lady GaGa го освежила светот кога тоа најмногу му било потребно во време на финансиската криза, а фановите, пак, се прашуваа - што треба да значи Poker Face?! На еден од нејзините концерти, Lady GaGa објасни дека тоа е, всушност, метафора за нејзината бисексуалност.
29.05. - 18.06. Daniel Schumacher - Anything But Love
Кастинг-ѕвездата Daniel Schuhmacher беше победникот во шестата сезона на германската верзија на шоуто Поп-идол. А како што обично се случува со победниците од ваквите кастинг-шоуа, претходно немале никакво музичко образование и се занимавале со сосема обични професии. Daniel Schuhmacher, на пример, завршил стручно образование за продавач.
19.06. - 02.07. Lady GaGa - Poker Face
03.07. - 27.08. Emiliana Torrini - Jungle Drum
Jungle Drum e третиот сингл од третиот албум на Emiliana Torrini, Ме And Armini. Песната ќе поминеше прилично незабележана во Германија, доколку не се појавеше во Germany's Next Top Model, шоуто на германскиот топ-модел Heidi Klum, каде се пријавуваат девојки чија амбиција е да ги освојат светските модни писти.
28.08. - 01.10. Marit Larsen - If A Song Could Get Me You
Мarit Larsen доаѓа од Норвешка, каде веќе е добро позната, а синглот If A Song Could Get Me You беше првиот што доживеа и интернационална промоција и беше издаден во Германија, Швајцарија и Австрија.
02.10. - 08.10. Rammstein - Pussy
Pussy е првиот сингл од шестиот студиски албум на Rammstein, насловен Liebe ist für alle da. Инаку во песната се зборува за клишето Германците како секс-туристи, кои поради тоа што дома не можат да си најдат соодветен партнер, тоа го прават во странство.
09.10. - 13.10. David Guetta feat. Akon - Sexy Bitch
Синглот Sexy Chick беше вториот хит од албумот One Love на David Guetta, на кој соработува со најпопуларните изведувачи во моментов. Една недела беше на врвот во Германија, а со истиот сингл David Guetta ги освои листите во уште осум други земји.
14.10. - 22.10. Lady GaGa - Paparazzi
Lady GaGa вели дека инспирација наоѓа во ѕвездите од глам-рок ерата, како David Bowie и Queen, но и од поп-пејачите како Michael Jackson и Madonna. И модата исто така е многу битна за Lady GaGa, истакнувајќи дека таа зазема значајно место во компонирањето на музиката и нејзината изведба. Пејачката родена како Stefani Joanne Angelina Germanotta досега има продадено преку 20 милиони синглови и осум милиони албуми.
23.10. - 12.11. Robbie Williams - Bodies
Подобро од Let Me Entertain You, добро како Rock DJ, но не толку добро како Feel - така критичарите го оценија повратничкиот сингл на Robbie, за кој на сите им беше јасно дека ќе биде од одлучувачко значење за иднината на неговата кариера. А ако може да се суди по пласирањето на листите - таа воопшто не е загрозена, второ место во Велика Британија во првата недела од продажбата, а малку подоцна, кон крајот на октомври и почетокот на ноември, на шампионското место во Германија.
13.11. - 19.11. Ich+Ich - Pflaster
Првпат од нивното основање Ich + Ich успеваат да го освојат врвот во Германија, токму синглот Pflaster. Меѓутоа, славјето не траеше долго, бидејќи наредната недела првото место повторно го презеде Robbie Williams, но потоа Ich + Ich уште еднаш застанаа на шампионското место.
11.12. - 17.12. The Black Eyed Peas - Meet Me Halfway
Пејачката Fergie изјави дека додека ги снимала вокалите за песната се транспортирала себеси во 1985 година, кога имала десет години и кога првпат во живо гледала концерт на Madonna. Пред себе ја имав личноста на Madonna додека ја снимав песната, вели Fergie, која цела 2010 година ќе ја помине на турнеја со бендот, за потоа да направи пауза и да се посвети на основањето семејство.
18.12. - 24.12 Aura Dione - I Will Love You Monday (365)
Вистинска скандинавска инвазија ја зафати Германија оваа година, по Маrit Larsen, и Aura Dione, која доаѓа од Данска, го освои врвот на Германскиот топ десет. Во нејзината родна земја синглот I Will Love You Monday не забележа некој позначителен успех. Инаку таа дебитираше во Данска уште во 2007 година.
25.12. - 31.12. Keri Hilson - I Like
Откако влезе под закрилата на продуцентот Timbaland, Keri Hilson за брзо време успеа да се искачи меѓу првата лига соул и R&B изведувачи. На третиот сингл I Like од нејзиниот деби-албум, Keri соработува со германските продуценти David Jost и Robin Grubert.
Извор: Media control GfK
Автор: Трајче Тосев
Редактор: Елизабета Милошевска Фиданоска