„Ваква страст ѝ недостасуваше на германската репрезентација“, ја коментираат германските медиуми победата на Хрватска над Англија во полуфиналето на Мундијалот и донесуваат анализи и очекувања за финалето со Франција.
Фотографија: picture alliance/dpa/AP/F. Augstein
Реклама
Победник може да биде само еден- и тоа на синоќешниот натпревар не беше Англија. „Зиддојче цајтунг“ пишува дека „цела Англија плаче по полуфиналето против Хрватска“, со оценка оти „Хрватите се мајстори во продолжетоци“. „Шпигел“ во своето интернет издание, исто така, пишува за „драмата во продолжетоци“ во коja „Хрватите ги скротија (англиските) лавови“. Порталот на германскиот неделник особено ја истакнува улогата на Иван Перишиќ: „Поранешниот играч на Борусија од Дортмунд е сѐ уште потценет“.
Заклучок на германските медиуми по победата на Хрватска е сумиран во насловот на таблоидот „Билд“: „Оваа страст ѝ недостасуваше на германската репрезентација“, пишува коментаторот Валтер Штратен. „Франција против Хрватска! Оној кој се кладел пред Светското првенство на такво финале, би можел во обложувалница да собере многу пари. Пред неполни 4 недели да се кажеше дека оваа двојка ќе игра во финале би било сензација.“
Хрватска во фудбалска славеничка еуфорија
01:09
This browser does not support the video element.
„Но како се одвиваше турнирот, тоа не беше така. Малата Хрватска (4,2 милиони население), не многу поголема од Берлин, низ Светското првенство се бореше, гризеше, повлекуваше. Три продолжетоци по ред- тоа на ниту една друга екипа не ѝ има успеано досега. 'Коцкастите' играа со страст која можеше само да се посака од германскиот тим. Со Модриќ од Реал и Ракитиќ од Барселона- тоа е највештиот среден ред на Светското првенство. Со Перишиќ и Манџукиќ- брутално ефикасен напад“.
Сепак, заклучокот на коментаторот на „Билд“ нема да им се допадне на Хрватите, бидејќи Штратен пишува: „Честитаме, Хрватска! Но, светски првак ќе биде Франција. Никој не е на исто играчко ниво со Мбапе, Гризман, Канте, Погба. Тоа ќе направи разлика во недела.“
Фотографија: picture-alliance/L.Perenyi
Хрватска или Франција?
И келнскиот таблоид „Експрес“, покрај текстот под наслов „Каков криминален филм! Манџукиќ ја бутна Хрватска во финале“, објавува уште два коментара. Првиот е на Тобијас Шрадер со наслов „Зошто сум за тоа Хрватска да биде светски првак?“: „Хрватска ќе биде светски првак. Да го кажеше некој ова пред Светското првенство, брзо ќе го прогласеа за луд. Но, на ова првенство сите работи се поинакви. Од големите фаворити во игра е само уште Франција. Белгија и Англија беа фаворити од сенка, Хрватска беше малку зад нив. Половина од стартната постава на Хрватите има врска со Бундеслигата: Манџукиќ, Ребиќ, Ракитиќ, Перишиќ, Крамариќ и други. Освен тоа, нивните најдобри играчи играат и во најдобрите екипи во Европа: Ракитиќ во Барселона, Модриќ во Реал, Манџукиќ во Јувентус и Ловрен во Ливерпул. Тие со својата игра можеби не беа целосно уверливи, но нивната страст и посветеност на играта за нивната земја, но и за луѓето пред екраните, вклучувајќи ме и мене, ги воодушевија сите. Би била убава, луда приказна кога најмалата земја меѓу полуфиналистите (4,2 милиони, рачиси 500.000 Хрвати живеат во Германија), за првпат во историјата би успеала да стигне на престолот во светот на фудбалот“, пишува Тобијас Шрадер во „Експрес“.
Во истовреме, тука е и коментарот на Јулијан Вицел „Зошто сакам Франција да стане светски првак?“: „Сосема е јасно: Франција ќе биде светски првак. Стабилна одбрана, грандиозен напад и притоа најврелото железо во целиот жар на Светското првенство- Килијан Мбапе, достоен наследник на Меси и Роналдо. Конечно еден за кого навивачите мислат: наредниот светски фудбалер е подготвен. Французите знаат да направат спектакл. На ова здoдевно првенство на гледачите со огнометот против Аргентина, им го дадоа сето тоа што фудбалот го прави убав и исклучителен: напнатост, темпо и чиста драматика“, пишува Јулијан Вицел во „Експрес“.
Илустрирана историја на светските фудбалски првенства
Од германското „Чудо од Берн“, преку „Божјата рака“ на Марадона, до Зидановиот „Удар со глава 2006“. Историјата на светските фудбалски првенства е полна со незаборавни моменти. Вака ги гледа карикатуристот Херман Аксел.
Фотографија: Aczel / Edel Books
„Монтевидео, бог те видео!“
Првото Светско фудбалско првенство е одржано во Уругвај во 1930. Повеќето учесници беа од северна, централна и јужна Америка, а од Европа стигнаа само четири екипи, меѓу кои и југословенската. Во финалето домаќинот го победи вечниот ривал - Аргентина. Резултатот 4:2.
Фотографија: Aczel/Edel Books
Чудото во Берн
Првото СП по Втората светска војна беше одржано во 1954 година, во Швајцарија. Најсилна екипа беше репрезентацијата на Унгарија. Во првото коло „унгарската лесна коњица“ ја совлада Германија со 8:3. Но, Германците им се оддолжија во финалето (3:2) и првпат станаа светски рпваци. Фриц Валтер (лево) и легендарниот тренер Сеп Хербергер на рамената на навивачите.
Фотографија: Aczel/Edel Books
Само еднаш
Англија - „мајката на фудбалот“ - само еднаш во историјата на светските фудбалски првенства беше првак и тоа на домашен терен во 1966 година. Во финалето ја совлада Германија со резултат 4:2. И денес е спорен голот кој Англија го постигна во 101. минута. Боби Мур (на сликата со пехар в раце) и неговите соиграчи на Англија ѝ ја донесоа првата и засега единствена титула првак на светот.
Фотографија: Aczel/Edel Books
Бразилска самба
Бразил во 1970 година по третпат стана светски првак. Кралот на фудбалот - Пеле (на сликата) и неговите соиграчи беа магионичари на теренот во Мексико. Во финалето ја совладаа Италија со резултат 4:1. На шест натпревари на СП, Пеле постигна 19 голови. Првпат таа година сите натпревари се пренесувани на телевизија во боја.
Фотографија: Aczel/Edel Books
Бомбардер на нацијата
На СП кое во 1974 година првпат е одржано во Германија, имаше неколку премиери: „Кајзер Франц“ Бекенбауер против „кралот на тоталниот фудбал“ Кројф, Запад против Исток, нов пехар. Во финалето домаќинот играше против Кројфовата Холандија и Германија славеше со резултат 2:1. Победничкиот гол го постигна „бомбардерот на нацијата“ Герд Милер (во средина).
Фотографија: Aczel/Edel Books
Божја рака
Светското првенство во 1986. во Мексико ќе остане запаметено како шоу на аргентинската фудбалска ѕвезда Диего Марадона. Благодарение на неговата генијалност и лукавство, Аргентина по вторпат стана првак на светот. Самиот Марадона постигна убав, но според гол. На средбата против Англија, со помош на раката ја уфрли топката во голот. Марадона подоцна изјави дека тоа била „Божја рака“.
Фотографија: Aczel/Edel Books
Плукање
Во 1990. Германија во Италија ја прослави третата титула светски првак. „Панцерите“ (во превод - тенкови) во финалето ја победија Аргентина со 1:0. Првенството ќе остане запаметено по неспортското однесување на Холанѓанецот Франк Рајнкард (десно) кој го плукна Руди фелер во осминафиналето. Двајцата беа исклучени од игра. Германија победи со 2:1 и се реваншираше за поразот на ЕП од 1988 година.
Фотографија: Aczel/Edel Books
Зидановиот удар со глава
Во 2006 година повторно славеше Германија, која по изведувањето пенали како домаќин во финалето ја совлада Франција. Неславен момент на првенството беше кога капитенот на француската репрезентација Зидан со глава го удри Италијанецот Матераци. Исклучен е од натпреварот и тоа означи крај на неговата успешна фудбалска кариера.
Фотографија: Aczel/Edel Books
Конечно титула
На СП во Јужноафриканската Република доминираше Шпанија со својата „тика-така“ игра. Шпанците во финалето ја совладаа Холандија со резултат 1:0. Победничкиот гол го постигна Андреас Ињеста (број 6 на сликата). Германија во борбата за трето место го совлада Уругвај со резултат 3:2.
Фотографија: Aczel/Edel Books
Крал на дриблинзите
На СП во 2014 годинина Аргентина ја предводеше Лионел Меси. Неговите мајсторски дриблинзи ја доведоа Аргентина до финалето, каде што ја чекаше Германија, која претходно го совлада домаќинот Бразил со 7:1.
Фотографија: Aczel / Edel Books
Екипа со четири титули
Финалната средба на СП во 2014 година се одигра пред 75.000 гледачи на стадионот Маракана во Рио де Жанеиро. Германија ја победи Аргентина со резултат 1:0 и така стана прва европска репрезентација која освоила титула на американскиот континент. На сликата се играчите на германската репрезентација кои настапија во финалето.
Фотографија: Aczel / Edel Books
Низ светските првенства - со стрип
Издавачката куќа „Едел Букс“ по повод СП во Русија во продажба пушти илустрирана историја на светските фудбалски првенства под наслов „World Cup 1930-2018“. Незаборавните моменти од 84-годишната историја се претставени со многу хумор.
Фотографија: Aczel / Edel Books
Карикатуристот
Аргентинскиот уметник Херман Аксел (Germán Aczel) својата кариера ја почна во родниот Буенос Аирес, во кој, покрај останатото, работеше и за спортското списание „Ел Графико“. На 26-годишна возраст се досели во Германија и денес живее во Минхен. Во моментов работи за реномираниот англиски фудбалски магазин „FourFourTwo“.