Премиерот на Грција, Алексис Ципрас, најавил дека наскоро ќе дојде во официјална посета на Скопје. Тој истакнал оти ќе биде првиот грчки премиер кој го сторил тоа, пренесоа денеска македонските медиуми.
Фотографија: Reuters/A. Konstantinidis
Реклама
„Ќе бидам првиот грчки премиер кој официјално ќе го посети Скопје“, рекол грчкиот премиер Алексис Ципрас на Економскиот форум во Делфи и споменал дека притоа ќе биде придружуван од бизнис делегација и оти ќе биде формиран висок совет за соработка меѓу двете соседни земји.
Грчкиот премиер зборувајќи за Преспанскиот договор кој го постигна со македонскиот колега Зоран Заев истакнал дека тој претставува дипломатско ремек-дело и оти ќе биде запишано во историјата, бидејќи за првпат на Балканот во едно билатерално прашање постоела политичка волја да се порази национализмот на двете страни.
„Денес Грција и Северна Македонија се соседи кои вложуваат во пријателство, соработка и солидарност и соседи кои дадоа пример не само на Балканот и Европа, туку и во светот“, изјавил грчкиот премиер Ципрас.
Договор за решавање на спорот за името
Договорот за решавање на спорот за името меѓу Македонија и Грција беше потпишан на 17 јуни 2018. Тој би требало да му стави крај на спорот кој трае четврт век. Но, до неговото конечно спроведување има уште работа.
Договорот за решавање на спорот за името во Псарадес, на грчката страна од Преспанското Езеро, го потпишаа министрите за надворешни работи Никола Димитров и Никос Коѕијас. „Горди сме затоа што избравме решение што нѐ обединува“, оцени македонскиот премиер Заев. Неговиот грчки колега Ципрас рече: „Овде сме да ги залечиме раните што ги остави времето, да отвориме пат за мир, братство и пораст“.
Фотографија: Reuters/A. Konstantinidis
Роденден
Потпис на договорот стави и долгогодишниот посредник на Обединетите Нации во спорот за името, Метју Нимиц. Потпишувањето се падна токму на неговиот 79-ти роденден. „На членовите на моето семејството им реков дека не сакам подароци за овој роденден, зашто двајца премиери ќе ми дадат еден голем подарок“, рече Нимиц на церемонијата во Псарадес.
Фотографија: Reuters/A. Konstantinidis
Вратоврска
Кога по потпишувањето на договорот требаше да се направи семејна фотографија од настанот, македонскиот премиер Зоран Заев, веројатно не сакајќи да се разликува од Алексис Ципрас, кој е познат по тоа што не носи вратоврски, ја извади својата црвена вратоврска и му ја подари на својот грчки колега. Тоа беше поздравено со широки насмевки и громогласен аплауз од присутните.
Фотографија: Reuters/A. Konstantinidis
Договорот зачинет со македонска храна и вино
Официјалната средба по потпишувањето во Псарадес се префрли на македонскиот брег на Преспанското Езеро. Двете делегации до Отешево стигнаа по воден пат, со чамци. Во Отешево се водеа билатерални разговори и имаше свечен ручек. На заедничкиот ручек присуствуваа и претставниците на Европската Унија и Обединетите Нации – Федерика Могерини, Јоханес Хан, Метју Нимиц и Розмари Ди Карло.
Фотографија: Reuters/A. Konstantinidis
Протести во Скопје
Потпишувањето на договорот за решавање на спорот за името предизвика протести во Македонија. Демонстрантите пред Собранието на 17.06.2018 се судрија со полицијата. Во безредијата имаше повредени и приведени лица. Според полициски наводи, има неколку повредени полицајци, како и над 25 уапсени учесници на протестите. Официјален организатор на протестите нема.
Во Грција исто така се протестира. Противниците на договорот за решавање на спорот за името во Атина за време на расправата за доверба на владата на Ципрас се судрија со полицијата пред парламентарната зграда (фото: 16.06.2018). Полицијата мораше да употреби солзавец за да ја разбие толпата која се обиде да влезе во парламентарната зграда. Владата го преживеа гласањето.
Фотографија: Reuters/C. Baltas
Уште многу работа
Ставањето потпис на Конечната спогодба за решавање на спорот за името е само еден од чекорите кои следуваат во наредните месеци до конечно решение. Следува ратификација во македонското Собрание, референдум на кој македонските граѓани ќе се изјаснат за договорот, а потоа и ратификација во грчкиот парламент.
На форумот во Делфи учествува и македонскиот министер за надворешни работи Никола Димитров. Меѓу неговите бројни билатерални средби на маргините на форумот, е и онаа со грчкиот ресорен колега Јоргос Картугалос, на која двајцата министри разговарале за проширување на натамошната соработка предвидена со Договорот од Преспа.
