ФДП го прифати предлогот на Партијата на Зелените, која денеска соопшти дека сака да започне трипартитни сондирачки разговори со СПД и ФДП (Либерали) околу формирањевладина коалиција. „Го прифативме предлогот на Зелените за разговри со СПД“, изјави лидерот на Либералите, Кристијан Линднер, кој на канцеларскиот кандидат на Социјалдемократите, Олаф Шолц, му предложил трите партии да се состанат на првични преговори уште в четврток, што е прифатено.

Според Линднер, не се водат паралелни разговори со Унијата и Зелените околу создавање коалиција. ФДП ќе влезе само во влада на политичкиот центар, која би ја засилила вредноста на слободата и би дала вистински импулс за обнова на земјата. Важни се либералните вредости, истакна Линднер, а со Унијата постојат најголеми содржински преклопувања, па за ФДП „Јамајка коалиција" и натаму останува реална опција.

Копретседателката на Зелените, Аналена Бербок претходно изјави дека  Германија  не може да се дозволи долга неизвесност, работите околу формирање влада мора да се одвиваат брзо.

По парламентарните избори , Зелените и Либералите  прво разговараа меѓусебно, а потоа секој од нив одвоено со Социјалдемократите и со партиите на Унијата (ЦДУ/ЦСУ) ги сондираше можностите околу постигнување компромисни линии.

Во поглед на можна коалиција од СПД, Зелените и ФДП, копретседателот на Зелените, Роберт Хабек изјави дека предсондирачките рунди во изминатите денови покажале дека токму тука постојат најголеми содржински преклопувања, што посебно се однесува на општествената политика.

Но, сепак и евентуалните сондирачки разговори со СПД и Либералите се отворени, постојат и големи разлики. Оттаму, оваа одлука на Зелените уште не значи и комплетно откажување од опцијата „Јамајка колиција“, односно коалиција на ЦДУ/ЦСУ, Зелените и ФДП, потенцира Хабек. 

Иако официјален победник на парламентарните избори од 26 септември се Социјалдемократите, математички е можна тн. „Семафор коалиција“ – СПД, Зелените и ФДП, исто како и „Јамајка коалиција“. Поради интерните партиски превирања и  борби за превласт кај Демохристијаните  и индискрецијата во поглед на предсондирачките разговори, Зелените и Либералите ја критикуваа Унијата, изразувајќи делумно сомнеж во нејзината владина способност.