Сингапур има многу ниски стапки на инфекции со коронавирусот од октомври досега. Набљудувачите ја фалат оваа град-држава во југоисточна Азија за одржување на вирусот под контрола со внимателно следење на нејзините граѓани, делумно со апликацијата за задолжително следење. Падот на инфекциите значи дека локалното население може да посетува кино на отворено - под услов да се одржува физичка дистанца.

Јужна Африка е најтешко погодената африканска земја од пандемијата на коронавирусот. Овој пациент во болница во близина на Кејп Таун е еден од 1,4 милиони граѓани кои се заразени со Ковид-19. Новата варијанта на коронавирусот, позната како B.1.351 или 501Y.V2, само го зголеми стравот. Исто како и новата варијанта на британскиот вирус, се смета дека оваа јужноафриканска мутација е многу позаразна.

Со зголемените летни температури, многу Австралијци се во можност да уживаат во освежително пливање во океанот. Поставени се знаци за да ги потсетат посетителите на плажите да држат дистанца додека уживаат во сонцето, во обид да се спречи нов пораст на инфекции. Австралија забележа значително намалување на бројот нови случаи од септември наваму.

Келвија Андреа Гонкалвес (16) плаче на гробот на нејзината мајка во бразилскиот град Манаус - Андреа дос Реис Брасао почина на само 39-годишна возраст. Таа е една од безбројните жртви од Ковид-19 во градот кој остана без неопходниот кислород. Многу луѓе го обвинуваат екстремно десничарскиот претседател Жаир Болсонаро за мрачната состојба во земјата. Во Бразил од вирусот починаа над 221.000 лица.

Во Хонг Конг, властите оградија цели населби без предупредување како одговор на ненадејниот пораст на инфекциите. Градот, посебен административен регион на Кина, наметна слични драконски мерки за спречување на епидемијата на вирусот како оние кои беа во сила во Кина. До неодамна, стапките на инфекции тука беа многу ниски.

Американскиот рок-бенд The Flaming Lips смисли начин како да организира концерти со физичка дистанца: на неодамнешниот концерт во Оклахома Сити, бендот ја замоли публиката да влезе во пластични меури кои се надувуваат. На овој начин, тие можеа да се танцуваат додека безбедно се изолирани во сопствени меури. Публиката дури можеше да го држи на раце и фронтменот Вејн Којн кој се стркала од сцената.

Многу цркви во моментов се затворени поради пандемијата, па местата за богослужба се претвораат во центри за итна вакцинација- како тука во катедралата Лихфилд, во близината на Бирмингем, Англија. За разлика од земјите во ЕУ кои во моментов се соочуваат со недостиг на вакцини против Ковид-19, Велика Британија редовно се снабдува со дози.

Ејми Езат подготвува торта  во форма на вакцина која треба да се дистрибуира меѓу пациентите со Ковид-19 кои се лекуваат во болницата во Каиро. Египет се бори да ја активира својата кампања за имунизација низ целата земја. Сепак, на многумина можноста да се вакцинираат против коронавирусот им дава огромно чувство на надеж.

Ненси и Брајан Ален пред својата куќа во Нов Јужен Велс, Австралија. Ветрот носи пепел и чад од подрачјата кои се во пламен, небото е обоено во портокалова боја. Пожарите во Австралија беснееја со месеци. Животот го загубија 34 лица, изгоре површина поголема од површината на Ирска. Сликите од природната катастрофа доминираа на почетокот на 2020.

Четин Ѓултекин ја става својата рака врз портретот на брат му Ѓокхан. 37-годишникот беше убиен во расистичкиот напад во Ханау, заедно со уште осум други лица. Подоцна напаѓачот ја уби и мајка си и себеси. 27 метри големата слика е насликана од колектив на уметници на столб од мост и треба засекогаш да потсетува на жртвите.

И оваа слика предизвика големо внимание: на собир во Лондон, во рамки на протестите на движењето „Black-Lives-Matter“, Патрик Хачинсон на рамена носи, веројатно повреден, човек на безбедно. Британските медиуми јавија дека човекот бил дел од десничарите контрадемонстранти. Хачинсон, кој бил задолжен за безбедноста на демонстрантите црнци, беше славен на социјалните мрежи за оваа своја акција.

Оваа демонстрантка со мобилниот телефон в раце, во поза на Статуата на слободата во Њујорк, протестира на улиците на Варшава по контроверзните избори во Белорусија. Демонстрациите се во знак на солидарност со белоруските опозиционери на улиците, а вклучените светла на телефоните треба да сигнализираат зрак светлина во темнината на ноќта.

Разорната експлозија во пристаништето во Бејрут однесе околу 200 животи, а уништи и голем број објекти. Меѓу нив и станот на пијанистот Рајмонд Есајан. Музичарот доживеа потрес на мозокот. Сепак, тој не престана да музицира. Есајан од расфрланите предмети од експлозијата направи форма на клавир и во музичко видео отсвири нова песна.

Оваа слика предизвика иритации ширум светот. Претседателот на САД, Доналд Трамп, со Библија в рака стои пред црква во Вашингтон, најверојатно за да поентира кај своите евангеликански избирачи. За да се овозможи овој настап, претходно со солзавец беа растерани демонстрантите собрани пред Белата куќа. За многумина тоа беше потег кој и не е баш христијански.

Кога лекарот Џозеф Верон го посетил Ковид-19 одделението во својата болница во Тексас, го здогледал овој пациент, осамен и во солзи. Не смеел да прими посета ни за Денот на благодарноста. „Само рече: 'Сакам да бидам со сопругата'“, изјави Верон за порталот „Хрон“. „Потребен му беше некој кој ќе го прегрне.“ Сликата го обиколи светот.

Не, ова не е фотомонтажа. Овој трамвај во Холандија не застанал каде што треба и како што треба. Бил запрен од големото уметничко дело во близина, па не пропаднал. За среќа, никој не е повреден.

Изгледа речиси како киборг. На доделувањето на музичките МТВ-награди во 2020-та, Алиша Кис имаше впечатлив настап. Доделувањето на наградите се одвиваше виртуелно поради пандемијата на коронавирусот.

Дејна Кларк и нејзиниот 18-месечен син Мејсон чекаат пред Градското собрание во Њу Орлеанс за да гласаат на претседателските избори во САД. Кларк раскажа дека себеси и на детето ставила еден вид заштитна капсула, затоа што не знаела колку луѓе ќе носат маски.

Каква врска имаат американските избори со село во јужната индиска сојузна држава Тамил Наду? Во 2020 година имаат голема врска, зашто заменичката на демократот Џо Бајден, Камала Харис, има индиски корени. Нејзиниот дедо по мајка потекнува од местото Туласендрапурам. Луѓето таму се молеа за победа на Харис и славеа што таа ќе стане потпретседателка на САД.

Дедо Мраз седи во голема снежна топка и во Алборг, Данска, ги поздравува децата според корона-правила. Божик во време на пандемија беше поинаков не само за децата, туку и за возрасните, кои мораа да се откажат од големи семејни собири. Да се надеваме дека наредниот Божик ќе биде повторно „нормален“, а снежната топка... Па, би можела и да остане.