Шест нови случаи на коронавирус, први во Штип и Гостивар
БГ
19 март 2020
Во изминатото деноноќие евидентирани се шест нови случаи на лица заразени со Ковид-19, информира вечерва министерот за здравство Венко Филипче. Вкупниот број на заразени достигна 48 лица.
Фотографија: Regierung Nordmazedonien
Реклама
Четиригодишно девојче од Штип е најмладиот пациент заразен со коронавирусот досега евидентиран во Северна Македонија, информира Филипче. Девојчето најверојатно се заразило во Велика Британија од каде семејството се вратило на 14 март. Сега ќе биде сместена на Клиниката за инфективни болести во Скопје заедно со нејзината мајка.
За првпат од почетокот на епидемијата, коронавирусот сега се дисперзира и пошироко низ земјата, а вкупниот број случаи достигна 48. Сите случаи досега беа концентрирани во Скопје и Дебар. Но освен Штип, еден случај, жена-повратник од Швајцарија, е регистриран и во Гостивар. Уште три случаи во последните 24 часа се евидентирани во Дебар, и еден нов во Скопје кој бил во директен контакт со заболените откриени во последниве неколку дена.
Каде сѐ демне коронавирусот?
Коронавирус насекаде! Можеби дури и на пиперките, билетот за возење, сопственото домашно милениче. Што воопшто смеам да допирам? Ова вознемирувачко прашање си го поставуваат многумина. Еве неколку смирувачки одговори:
Досега познатите коронавируси остануваат опасни на површини како кваките околу четири-пет денови. Како и другите инфекции преку капки и SARS-CoV-2 се пренесува преку рацете и површините кои се допираат често во текот на денот. Иако вирусот е нов и затоа е прилично непознат, експертите сметаат дека и за него важат многу резултати од истражувања на други, веќе познати коронавируси.
Затоа, треба да се биде претпазлив и кога се руча во кантината на работното место - доколку таа одамна не е веќе затворена. Коронавирусите во основа можат преку кивање или кашлање на инфицирано лице да завршат на приборот за јадење или чиниите. Германскиот институт за проценка на ризици (БфР) меѓутоа пишува дека „досега не се познати инфекции со SARS-CoV-2 кои се појавиле со ваков начин на пренос“
Фотографија: picture-alliance/dpa/J. Kalaene
Страв од увозна стока?
Дали родителите мора да се плашат од инфекција преку играчки од увоз? Не, велат од БфР. Досега нема случаи на инфицирани лица за кои е докажано дека се заразиле преку увезени играчки или друга стока. Експертите сметаат дека вирусите немаат голема стабилност при промена на животната средина. Предизвикувачот на болеста е опасен повеќе денови пред сѐ во услови на студ и голема влажност на воздухот.
Фотографија: picture-alliance/dpa/S. Gollnow
Пакети полни вируси
Коронавирусите кои го напаѓаат човекот не се особено стабилни на суви површини. Со оглед на тоа што стабилноста на вирусите надвор од човечкиот организам зависи од могу фактори, како темпертурата и влажноста на воздухот, БфР ја смета инфекцијата по пошта за „главно неверојатна“. Сепак, институтот признава дека сѐ уште не располага со точни податоци за SARS-CoV-2.
Фотографија: picture-alliance/dpa/M. Becker
Вирусен пинг-понг со домашното милениче?
Дали моето куче може да ме зарази мене или јас да го заразам него? Ризикот домашните миленичиња да се заразат од коронавирус е оценет како низок од страна на експертите. Но, тој не може сосема да се исклучи. Самите животни не покажуваат симптоми, значи не заболуваат. Но, доколку се инфицирани тие може преку својот здив, плунка, повраќање, урина да го пренесуваат вирусот.
Фотографија: picture-alliance/dpa/AP/A. Tarantino
Опасен зеленчук?
Пренесување на SARS-CoV-2 преку контаминирани прехранбени продукти, според БфР, не е веројатно. Досега нема докажани случаи на инфицирање на ваков начин. Темелно миење на рацете пред подготовка на оброкот, и во времиња пред и по коронавирусот, е нешто што се подразбира. Со оглед на тоа што вирусите се чувствителни на топлина, загревањето на намирниците натамошно го намалува ризикот од инфекција.
Досега познатите САРС и МЕРС коронавируси не сакаат топлина, но се прилично отпорни на студ. Тие може да останат опасни дури две години на температури од минус 20 степени Целзиусови. БфР меѓутоа смирува: досега нема укажувања за ланец на инфекции со SARS-CoV-2 преку конзумирање храна, вклучително и замрзнати продукти.
Избувнувањето на КОВИД-19 има и едно добро: Кина забрани храна од диви животни. Сѐ укажува на тоа дека новиот коронавирус врз човекот е пренесен од лилјаци. Лилјаците за тоа не се виновни, зашто веројатно завршиле во супа против своја волја. Но, борбата против SARS-CoV-2 ќе трае многу подолго и ќе биде потешка од ослободувањето од храна од диви животни.
Фотографија: picture-alliance/Photoshot/H. Huan
8 фотографии1 | 8
„Бројот на пациенти е во пораст, здравствениот систем засега е добро менаџиран. Исклучително е добро тоа што пациентите се откриваат во раната фаза, затоа што оние во доцна фаза го колабираа здравствениот систем во многу други земји“, оцени на вечерашната прес-конференција Филипче.
Според министерот, добро е што засега вкупниот број на заразени од вирусот е низок, што му овозможува на здравствениот систем да реагира навремено.
„Ова не е нешто што може само здравствениот систем да го изменаџира. Исклучително е важна улогата на граѓаните и нивната свест“, порача Филипче.