Ширењето на коронавирусот во Куманово не е причина за аларм
БГ
31 март 2020
Најголем дел од новорегистрираните случаи на заразени со коронавирус во земјата се од Куманово. Надлежните се уште не сметаат дека е време градот да се стави во карантин. Пендаровски смета дека државата адекватно реагира
Фотографија: Regierung Nordmazedonien
Реклама
Од 44 нови случаи на заразени со коронавирус во земјата во последното деноноќие, 23 се жители на Куманово. Еден 45-годишен кумановец е меѓу двајцата починати во истиот период на Инфективната клиника во Скопје. Втората жртва е 78-годишен маж од Дебар. Двајцата имале хронични болести.
Според министерот за здравство Венко Филипче, големиот раст на бројот на евидентирани заразени лица во Куманово е резултат на засиленото тестирање, но засега нема потреба од дополнителни мерки. Градоначалникот на Куманово Максим Димитревски уште од минатата недела бара неговата општина да биде ставена во карантин, но експертите сметаат дека се уште нема потреба од таков чекор.
„Во Куманово се земени многу материјали. Многу е рано да се каже дали зголемувањето е драматично. Свесни сме за барањата кои што пристигнуваат од повеќе општини. Ние одлуките ги носиме врз основа на проценка на епидемиолозите. Не би судел врз основа на денешните случаи“, вели Филипче.
На Инфективната клиника во Скопје се лекуваат 54 болни од Ковид-19. Четворица од нив се во критична состојба, а 20 дишат со помош на кислородна маска.
Вкупниот број на заразени од коронавирус во земјата се искачи на 329 лица. Министерот Филипче оценува дека линеарното зголемување на бројот на заразени и натаму е добро, и очекува пикот да биде достигнат кон крајот на април. „Зголемувањето на пациенти во овој период е според очекувањата на епидемиолозите. Тој тренд ќе продолжи се до пикот, кој според сегашните проценти се очекува на крајот од месец април“, рече тој.
Шефот на државата Стево Пендаровски денеска свика уште една седница на Советот за безбедност во проширен состав, по која заедничката оценка е дека состојбата во државата е „адекватна“. Пендаровски оцени дека сите институции добро се носат со кризата, и рече дека продолжувањето на вонредната состојба за уште 30 дена е извесно доколку ситуацијата остане на актуелното ниво.
„Состојбата е сложена и непредвидлива“, рече Пендаровски и „никој не може да предвиди уште колку ќе трае пандемијата“.
Каде сѐ демне коронавирусот?
Коронавирус насекаде! Можеби дури и на пиперките, билетот за возење, сопственото домашно милениче. Што воопшто смеам да допирам? Ова вознемирувачко прашање си го поставуваат многумина. Еве неколку смирувачки одговори:
Досега познатите коронавируси остануваат опасни на површини како кваките околу четири-пет денови. Како и другите инфекции преку капки и SARS-CoV-2 се пренесува преку рацете и површините кои се допираат често во текот на денот. Иако вирусот е нов и затоа е прилично непознат, експертите сметаат дека и за него важат многу резултати од истражувања на други, веќе познати коронавируси.
Затоа, треба да се биде претпазлив и кога се руча во кантината на работното место - доколку таа одамна не е веќе затворена. Коронавирусите во основа можат преку кивање или кашлање на инфицирано лице да завршат на приборот за јадење или чиниите. Германскиот институт за проценка на ризици (БфР) меѓутоа пишува дека „досега не се познати инфекции со SARS-CoV-2 кои се појавиле со ваков начин на пренос“
Фотографија: picture-alliance/dpa/J. Kalaene
Страв од увозна стока?
Дали родителите мора да се плашат од инфекција преку играчки од увоз? Не, велат од БфР. Досега нема случаи на инфицирани лица за кои е докажано дека се заразиле преку увезени играчки или друга стока. Експертите сметаат дека вирусите немаат голема стабилност при промена на животната средина. Предизвикувачот на болеста е опасен повеќе денови пред сѐ во услови на студ и голема влажност на воздухот.
Фотографија: picture-alliance/dpa/S. Gollnow
Пакети полни вируси
Коронавирусите кои го напаѓаат човекот не се особено стабилни на суви површини. Со оглед на тоа што стабилноста на вирусите надвор од човечкиот организам зависи од могу фактори, како темпертурата и влажноста на воздухот, БфР ја смета инфекцијата по пошта за „главно неверојатна“. Сепак, институтот признава дека сѐ уште не располага со точни податоци за SARS-CoV-2.
Фотографија: picture-alliance/dpa/M. Becker
Вирусен пинг-понг со домашното милениче?
Дали моето куче може да ме зарази мене или јас да го заразам него? Ризикот домашните миленичиња да се заразат од коронавирус е оценет како низок од страна на експертите. Но, тој не може сосема да се исклучи. Самите животни не покажуваат симптоми, значи не заболуваат. Но, доколку се инфицирани тие може преку својот здив, плунка, повраќање, урина да го пренесуваат вирусот.
Фотографија: picture-alliance/dpa/AP/A. Tarantino
Опасен зеленчук?
Пренесување на SARS-CoV-2 преку контаминирани прехранбени продукти, според БфР, не е веројатно. Досега нема докажани случаи на инфицирање на ваков начин. Темелно миење на рацете пред подготовка на оброкот, и во времиња пред и по коронавирусот, е нешто што се подразбира. Со оглед на тоа што вирусите се чувствителни на топлина, загревањето на намирниците натамошно го намалува ризикот од инфекција.
Досега познатите САРС и МЕРС коронавируси не сакаат топлина, но се прилично отпорни на студ. Тие може да останат опасни дури две години на температури од минус 20 степени Целзиусови. БфР меѓутоа смирува: досега нема укажувања за ланец на инфекции со SARS-CoV-2 преку конзумирање храна, вклучително и замрзнати продукти.
Избувнувањето на КОВИД-19 има и едно добро: Кина забрани храна од диви животни. Сѐ укажува на тоа дека новиот коронавирус врз човекот е пренесен од лилјаци. Лилјаците за тоа не се виновни, зашто веројатно завршиле во супа против своја волја. Но, борбата против SARS-CoV-2 ќе трае многу подолго и ќе биде потешка од ослободувањето од храна од диви животни.
