Германскиот канцелар Олаф Шолц ѝ изрази целосна солидарност на Украина. „Како демократи, како Европејци, стоиме на ваша страна - на вистинската страна на историјата“, изјави Шолц денеска во текот на владината изјава во Бундестагот.

На седницата посветена на рускиот напад врз Украина, германскиот канцелар, проследен со аплаузи од пратениците, ја бранеше одлуката за лиферување германско оружје за Украина: „На агресијата на Путин не можеше да се одговори на друг начин“, рече тој во насока на рускиот претседател Владимир Путин.

Шолц, повторувајќи дека е ова „Путинова војна“, оцени дека Путин нема преку ноќ да го промени својот курс, но руското раководство брзо ќе почувствува колку е висока цената што ќе мора да ја плати. Војната е катастрофа за Украина, но ќе се покаже и „како катастрофална за Русија“, рече Шолц.

Бундесверот ќе добие повеќе пари

Канцеларот најави големо зголемување на финансиските средства за германската армија. Бундесверот треба да добие 100 милијарди евра плус, а средствата треба да се искористат за неопходни инвестиции и вооружување на армијата. „Отсега, година за година, ќе инвестираме повеќе од два процента од брутодомашниот производ во нашата одбрана“, најави Шолц.

- повеќе: Агресијата на Путин во Украина и шокот на Германците

Германскиот канцелар ја потенцираше и одлучноста за придржување до членот 5 на НАТО. Мора да се спречи војната да се прелее на други земји, рече тој, нагласувајќи дека Германија без колебање се придржува до обврската за помош во НАТО. „Претседателот Путин не треба да ја потценува нашата решителност“, нагласи тој.