Злите духови на расизмот и антисемитизмот одново се појавуваат, предупредија претседателите на Германија и Израел во Берлин, на одбележувањето на 75-годишнината од ослободувањето на Аушвиц.
Фотографија: Getty Images/AFP/J. Macdougall
Реклама
Германците имаат обврска никогаш да не го заборават своето нацистичко минато и да го сопрат ширењето на омразата, рече претседателот Франк-Валтер Штајнмајер на седницата на Бундестагот посветена на 75-годишнината од ослободувањето на концентрациониот логор Аушвиц.
„Злите духови на минатото одново се појавуваат под нова маска“, рече Штајнмајер.
„Дополнително, тие ги претставуваат своите етнонационални, авторитарни размислувања како визии, како подобар одговор на проблемите на нашето време“.
Израелскиот претседател Реувен Ривлин ги повтори овие грижи во неговиот говор, предупредувајќи дека во посета на континентот доаѓаат „духови од минатото“.
„Грд и екстремен антисемитизам лебди над цела Европа“, рече Ривлин пред германските пратеници.
Меѓу присутните во германскиот парламент беа и пратениците на деснорадикалната АфД, која отворено ја отфрла културата на сеќавање во Германија и извинувањата за злосторствата сторени за време на нацистичкиот режим.
02:51
This browser does not support the video element.
Ривлин е вториот израелски претседател кој се обраќа пред германскиот парламент, по Шимон Перес во 2010.
Перес тогаш го искористи говорот за да повика на изведување пред правдата на преостанатите нацистички злосторници.
Сега фокусот се префрла на обидот да не се заборават ужасите на Холокаустот.
„Сега ги имаме четвртата, петтата и шестата генерација по Холокаустот и Втората светска војна“, рече Ривлин денеска пред учениците на еврејска гимназија во Берлин.
„Сега мора да најдеме начин да ви објасниме вам, и на вашите деца што се случи, и да спречиме тоа да се повтори“.
Штајнмајер ги повика учениците да го дополнат своето знаење од историските читанки со посети на Аушвиц и Израел.
Германскиот претседател говореше и за негативното влијание на социјалните мрежи. Тој спомена дека неговиот минатонеделен говор во кој ги повика Германците да се соочат со своето минато, привлекол „неверојатен“ број на негативни реакции на Фејсбук.
Темата за антисемитизмот во Германија се врати високо на политичката агенда откако еден неонацист во октомври минатата година се обиде да влезе во синагога во градот Хале и да изврши масакр врз присутните верници.
Напади врз синагоги во Германија
Обидот за напад во Хале не е првиот. И по 1945 година антисемитизмот во Германија го покажува своето лице – во форма на напади врз индивидуи, споменици или на осум синагоги.
Фотографија: picture-alliance/dpa/Avers
Напад во Хале на Јом Кипур
Околу 80 лица на 9 октомври 2019 година беа во синагогата во Хале кога во неа се обиде да влезе напаѓач. Според податоци на полицијата, притоа биле застрелани двајца минувачи, повеќе лица се повредени. Осомничениот сторител е 27-годишен Германец со десноекстремистичка позадина. Ова не е прво антисемитски мотивирано дело по 1945.
Фотографија: Imago Images/S. Schellhorn
Бран од написи
Во декември 1959 година синагогата во Келн е мета на напади на десноекстремната партија ДРП. Двајца нејзини членови на објектот исцртаа свастики и написот „Германците бараат Евреите да си заминат“. Следуваше бран антисемитски графити низ цела земја. Сторителите се осудени. Под влијание на настаните Бундестагот донесува Закон против хушкање на народите.
Фотографија: picture-alliance/Arco Images/Joko
Подметнат пожар по многу години
Нападот врз синагогата во Либек во март 1994 година предизвика ужасеност низ цел свет. По многу децении повторно беше запалена синагога. Сторителите се четворица мажи од деснорадикалното милје, сите се подоцна осудени за делото. Следниот ден 4000 граѓани од Либек се на улица да протестираат во знак на солидарност со Евреите. Во 1995 година синагогата повторно е мета на подметнат пожар.
Фотографија: picture-alliance/dpa/J. Büttner
Каменувана старата синагога во Есен
Во октомври 2000 година над 100 Палестинци од Либан, опремени со бекатонки, ја напаѓаат старата синагога во Есен. Инцидентот се случува по демонстрации против „насилството на Блискиот Исток“. Освен еден припадник на полицијата, настанот поминува без повредени лица. Заменикот генерален претставник на Палестинците во Германија, Махмуд Аледин, јасно се дистанцира од нападот.
Фотографија: picture-alliance/B. Boensch
По делото: „Бунт на пристојните“
Со запаливи материјали и камења во октомври 2000 година еден 19-годишен Палестинец и еден 20-годишен Мароканец ја оштетија Новата синагога во Диселдорф. Нивното дело било чин на одмазда спрема Евреите и Израел. Канцеларот Шредер реагира со зборовите: „Потребен ни е бунт на пристојните (...)". Сојузната држава, покраините и невладините организации инициираат бројни акции против екстремизмот.
Фотографија: picture-alliance/dpa/R. Weihrauch
Напад врз синагога во Мајнц
Во ноќта помеѓу 30 и 31 октомври 2010 година, кусо по нејзиното отворање, е подметнат пожар во новата синагога во Мајнц. Објектот е познат по својата архитектура, односно деконструктивистичкиот проект на архитектот Мануел Херц. Се наоѓа на местото на поранешната главна синагога во Мајнц, која била запалена во 1938 година.
Тројца млади Палестинци во јули 2014 фрлаат запалив коктел во синагогата во Вупертал. Судот оцени дека немало „никаква основа“ да се констатира дека момчињата се антисемитисти. Евреите во Германија, како и странските медиуми, се шокирани. Претседателот на еврејската заедница од Вупертал вели дека пресудата била „покана за извршување други кривични дела".
Фотографија: picture-alliance/dpa/C. Seidel
Спречен напад во Берлин
На 4 октомври годинава еден маж се прекачи преку заштитната ограда кај синагогата во Берлин и извади нож. Безбедносните служби го пресретнаа и го спречија нападот. Неговиот мотив е сѐ уште нејасен. Во 1943 година синагогата во Берлин беше уништена во бомбардирањето. Руините од големата синагога се урнати во 1970 година. Истата е обновена во 1990-те.
