На една недела пред претседателските избори во САД, пејачката Џенифер Лопез јасно се определи за Клинтон. И Бон Џови е на турнеја во поддршка на Хилари, настапувајќи на бесплатни концерти под мотото "Love Trumps Hate".

Американската пејачка е активна на сите начини во кампањата на Клинтон, пее на бесплатни концерти, оди во студентски домови, а кулминација е едно видео на кое гола ги повикува своите фанови да излезат на гласање. Клипот на Јутјуб има веќе преку 3,7 милиони клика.

Роберт Де Ниро пак исто така во видео не остава простор за сомнеж за кого се определил: „Тој вели дека ќе ги тепа луѓето кои протестираат на неговите настапи. Јас радо би му удрил една тупаница в лице. Би сакале ли ваков тип за претседател? Не верувам.“

Клинт Иствуд, напротив, е на страната на Трамп. „Живееме во ера на генерација слабаци“, тврди актерот, но овој веројатно највлијателен поддржувач на Трамп не е во никој случај негов најголем симпатизер. Тој само го смета за помало зло, констатира Иствуд.

Некои американски ѕвезди не се изјаснуваат јавно за Трамп, стравувајќи за својот имиџ. Но, Чарли Шин не спаѓа во нив. Откако претходно го критикуваше, летоска актерот напиша на Твитер: „Ако Трамп ме повика, веднаш би станал негов заменик-претседател!#TrumpSheen16".

Соочена со опасноста Трамп да стане претседател, дури и инаку неполитичката Мерил Стрип се качи на предизборната бина на демократите. Мерил не се сомнева воопшто во исходот од изборите: „Хилари Клинтон ќе биде претседателка на САД“.

Холивудската актерска ѕвезда Џорџ Клуни (десно) се прокламираше за симпатизер на Хилари уште додека таа беше сенатор, како што покажува фотографијава од 2003. година. Клуни во својата вила во Лос Анџелос организира вечерни забави за собирање парични донации за изборната кампања на Клинтон. Гостинот треба да плати 33.400 долари за вечерата.

Многу ефектно беше и гостувањето на Клинтон во емисијата на познатата американска ТВ-водителка Елен Деџенерис (десно), со американската комичарка Ејми Шумер (лево) и поп-ѕвездата Пинк, кога претседателската кандидатка танцуваше врбувајќи гласови на избирачите.

Листата на поддржувачи на Трамп во целина е кратка. Еден е борачот Халк Хоган, а за републиканскиот кандидат врбуваат и боксерскиот шампион Мајк Тајсон и пејачот Кид Рок, но само тивко, никој од нив не може да се види на јавните настапи на Трамп.

Мајли Сајрус од таборот на Клинтон неодамна одеше од врата до врата во колеџ во Вирџинија. Самонаречената „најголема светска феминистка“ се надева да ја види Хилари Клинтон како прва американска претседателка.

#HillaryForPresident Активноста на бројни проминентни личности преку различни социјални медиуми е насочена првенствено кон освојување на симпатиите на младите гласачи. Тие инаку се скептични кон Клинтон. За демократската кандидатка меѓутоа е добредојдена поддршката од ѕвездата од реалните ТВ-шоуа, Ким Кардашијан со нејзините речиси 50 милиони следбеници на Твитер.

Претседателските кандидати конечно пристигнуваат до крајот на трката која се чини дека трае цела вечност. Лицата на Доналд Трамп и Хилари Клинтон беа сеприсутни повеќе од една година, но и двајцата имаат голем број на необични карактеристики кои не допираат до јавноста.

Хилари Клинтон израснала во конзервативно семејство во Илиноис. Нејзиниот татко изработувал украсни завеси, а како млада жена таа била републиканка која ги поддржувала Бери Голдватер и Ричард Никсон. Дури подоцна таа станува демократ.

За Доналд Трамп, во минатото не беше лесно да се каже која или дали воопшто поддржува некоја партија. Во минатото тој поддржуваше кандидати на Демократската партија, меѓу кои беа Бил и Хилари Клинтон, а некои од неговите изјави во тоа време беа исклучително либерални. Тој многу доцна во својот живот го најде својот пат до Републиканската партија – на неверување на голем дел од нејзините членови.

Славата на Хилари Клинтон првично се должеше на фактот дека е сопруга на претседателот на САД. Но, кога Бил прв пат ја побарал за жена, таа рекла не. Тој морал да ја бара нејзината рака неколку пати додека таа не се согласи да биде негова сопруга.

Од 1996 до 2015 година Трамп поседувал дел од натпреварите за убавина: Мис Универзум, Мис на САД и Мис на САД за тинејџери. Во тоа време, тој повремено ги посетувал гардеробите зад сцената каде убавиците се преоблекувале, за да се увери дека „се е во ред“. Токму на тоа може да се должи изразот на Мис Калифорнија.

Клинтон беше првата жена што некогаш седнала во бордот на директори на американскиот ланец на супермаркети Вол Март. Компанијата, најблаго кажано, не е позната по тоа што е пријателска работна средина. Години подоцна, Хилари ја потпишуваше автобиографијата во една од продавниците на Вол Март - каде што вработените не можат да си дозволат да купат копија.

Иако кариерата ја започна со недвижности, Трамп се појавуваше и на голем број филмови и телевизиски шоуа, вклучувајќи го и реалното шоу „The Aprentice“. Тој е член на организацијата на телевизиски актери и од таму добива годишна пензија од 110.000 долари за неговите телевизиски појавувања. Ѕвездата на познатиот „Булевар на славата“ во Холивуд ја доби во 2007 година.

Како прва дама на САД, Хилари Клинтон беше позната поради експериментирањето со различните стилови. Во 1996 година магазинот „Венити Фер“ тврдеше дека таа сменила 43 фризури. На сликата е прикажана фризурата која ја носеше кога зборуваше за Моника Левински, практикантката со која нејзиниот сопруг имаше афера.

Трамп имаше бројни појавувања во боречкиот ринг како дел од наводната кавга со шефот на “World Wrestling Entertainment” Винс МекМахон. Учеството на Трамп во наместени борби му донесе место во „Wrestling Hall of Fame“. Веројатно е дека Трамп би сакал да ја повтори сцената на сликата со Хилари.

Многумина од оние кои се спротивставуваат на Хилари и добар дел од нејзините подржувачи се согласни дека гласот на Хилари не е многу пријатен за ушите. Сепак, тоа не ја сопре да освои Греми награда во 1997 година за најдобар говорен перформанс за аудио книгата на нејзината автобиографија. Патем, истата година Селин Дион освои награда за најдобар албум.