Ниту Груевски ниту Папандреу не излегоа пред новинарите по состанокот, но од македонска страна испратено е соопштение за јавноста во кое се вели дека двете страни се заложиле за што поскоро решавање на спорот за името и се истакнува важноста од целосно интегрирање на западнобалканскиот регион.

Европската Унија веќе две седмици со сите сили притиска Скопје и Атина да му стават крај на спорот за името, за да може Македонија да напредува кон старт на преговори за членство со Унијата, што е последниот услов.

Европската Комисија на 14-ти октомври годинава оцени дека Македонија ги исполнува сите услови за почеток на претпристапните преговори, но блокадата од страна на Грција е извесна доколку нема значително поместување во проблемот околу името.

Атина останува на својот став

Грчките дипломати, кои присуствувале на вчерашната средба Груевски-Папандреу, велат дека Атина го повторила ставот за име за севкупна уптреба и со географска одредница. Не е познато што порачала македонската страна во овој поглед.

Европската Унија би сакала да види напредок идеално до седми декември годинава, кога ќе се одржи министерскиот состанок на ЕУ на кој би можел да биде одреден и конкретен датум за преговорите. Сепак, не е исклучено процесот да трае подолго и овој датум да биде одреден на мартовскиот министерски самит идната година. Една од наведените причини за ваквото одлагање би можело да биде одржувањето на референдум за името во Македонија, што е едно од предизборните ветувања на ВМРО ДПМНЕ.

Европската Унија од своја страна, преку Оли Рен и Хавиер Солана два пати јасно стави на знаење дека не поддржува референдум и смета дека ова решение не е најдобро токму поради можното одолговлекување на процесот на решавање на спорот, како и поради ризикот тој да предизвика остри реакции во соседна Грција.

Автор: Тања Милевска

Редактор: Жана Ацеска