Голема прослава за огромно технолошко достигнување. Швајцарија денеска го отвора најголемиот тунел во светот. Изградбата чинеше 21,5 милијарди евра и беше завршена една година пред предвидениот рок.
Фотографија: picture-alliance/Keystone/C. Beutler
Реклама
Изградбата траеше 17 години: железничкиот тунел Готард со 57 километри е најдолгиот тунел во светот. Ги поврзува местата Ерстфелд и Бодио во швајцарските кантони Ури и Тесин. Трасата е рамна, без значајни нагорнини или тесни кривини.
Патничките возови низ новиот тунел ќе патуваат со брзина од 200 километри на час, додека товарните со околу 100. Можната максимална брзина изнесува 250 километри на час за патничките и 160 километри за товарните возови. До 2020 година за патување меѓу Цирих и Лугано ќе бидат потребни 45 минути помалку.
Наместо 180 товарни возови на ден - колку што минуваа низ стариот Готард тунел, сега ќе можат да сообраќаат 260. Кон тоа се придодаваат уште 65 патнички воза. Рамната траса на само 530 метри надморска височина овозможува сообраќање на подолги композиции со поголем товар, помалку локомотиви и пократки времиња за патување.
Повеќе факти за најдолгиот тунел во светот, проследени со возбудливи фотографии погледнете во следнава галерија:
Новиот швајцарски тунел е најдолг во светот
Швајцарија денеска свечено го отвора новиот железнички тунел кој е пробиен низ 57 километри од швајцарските Алпи. Технолошкото чудо - тунелот Готард, ги поврзува прекрасните села Ерстфелд и Бодио.
Фотографија: picture-alliance/dpa/B. Settnik
Преместување планини
По 17 години изградба, тунелот Готард е конечно подготвен за функционирање. Околу 28 милиони тони карпи се отстранети од швајцарските Алпи со помош на огромни дупчалки. Од остатоците од карпите е направен бетонот со кој се изградени фините ѕидови на тунелот. Првите возови треба да пропатуваат низ тунелот денеска, а во нормална употреба ќе биде ставен дури откако бидат изведен 3000 тест возења.
Главна предност на новиот Готард-тунел е рамната површина на неговите пруги, која овозможува потешките композиции да патуваат меѓу Ерсфелд и Бодио со помалку сила и поголема брзина. Планирано е низ тунелот дневно да проаѓаат 260 товарни возови, за разлика од 180 колку што можеа да минат низ стариот Готхард-тунел.
Фотографија: picture alliance/KEYSTONE
Машина за работа
Во проектот на изградба на новиот Готард-тунел работеа околу 2600 луѓе, вклучително и инженери, геолози и градежници. Потрошени беа 4 милиони работни часа. Шварцарија, позната по својата прецизност и точност, го заврши проектот една година порано со само малку пречекорен буџет.
Фотографија: AlpTransit Gotthard AG
Надминување на Јапонија
Со завршувањето на Готард-тунелот, Швајцарија ја симна од тронот Јапонија, како земја со најдолг подземен железнички тунел во светот. Сејкан тунелот под Цугару-теснецот во Јапонија, пуштен во употреба во 1988 година, е долг 53,9 километри.
Фотографија: Imago/Kyodo News
Тунелот под Ламанш
Новиот Готард-тунел е седум километри подолг од тунелот под Ламанш, кој се смета за едно од седумте чуда на модерното време. Тунелот е уште познат и како Еуротунел, долг е 50,5 километри и ги поврзува Велика Британија и Франција.
Фотографија: Getty Images/AFP/D. Charlet
Најдолг тунел - барем некое време
Неформалната титула на Готард како најдолг тунел во светот би можела да трае до 2026 година. Тогаш, имено е предвидено да заврши изградбата на железничкиот тунел Бренер, меѓу Австрија и Италија. Тој ќе се протега цели 64 километри и предвидено е да го растовари популарниот сообраќаен премин Бренер (на фотографијата).
Многу германски инженери работеа на изградбата на тунелот Готард, кој беше завршен една година пред предвидениот рок, а планираните трошоци беа минимално надминати. Тоа е во голем контраст со некои мега градежни проекти во Германија, меѓу кои највпечатлив е новиот аеродром во Берлин, кој веќе го надмина предвидениот рок за изградба за четири и пол години.
