Најголем дел од загинатите и повредените настрадале од удар на предмети носени од силниот ветар, кој на моменти достигнувал брзина од 216 километри на час, соопшти владиниот портпарол Јошиде Суга денеска утрото.

Тајфунот „Џеби“, кој својата максимална сила ја достигна вчера, е најсилниот што ја погодил Јапонија во последните 25 години. На удар беше западниот брег на земјата, а утрово бурата се повлече кон отворено море, оставајќи зад себе траги на пустош.

Однесени се покриви на објекти, уништени далноводи, поради што стотици илјади домаќинства останаа без електрична струја, во пристаништето Осака еден танкер се откачи од котвата и удри во мост, при што се предизвикани штети на него поради кои аеродромот Кансаи беше отсечен од копното, а освен тоа дел од аеродромот беше поплавен, откажани биле 162 летови.

Ноќеска околу 300 патници останале заглавени на аеродромот Осака, како што потврди претставник на Министерството за сообраќај. Утрово тие се пренесени со фериботи во Кобе, а сѐуште не се знае кога аеродромот ќе биде оспособен за редовно одвивање на авионскиот сообраќај.

Денеска уште важат уредбите за евакуација на околу 1,2 милиони луѓе. Според јапонската новинска агенција Јиџи, околу 16.000 граѓани во 20 префектури ноќта ја поминале во заеднички засолништа.