Пандемијата на коронавирусот предизвика многу ограничувања и проблеми за луѓето. Но Инга од Данска и Карстен од Германија не се предаваат. И покрај затворената граница тие наоѓаат начин да се гледаат.
Фотографија: picture-alliance/dpa/F. Molter
Реклама
Инга живее во Данска. Карстен живее во Германија. Границата меѓу Германија и Данска сега е речиси целосно затворена поради влошената ситуација со коронавирусот во двете земји. Но, тоа не ја спречува нивната љубов.
Секој ден, 85-годишната Инга Расмусен, и 89-годишниот Карстен Тиксен Хансен се среќаваат на границата за да помуабетат, да ручаат, да разменат бисквити, да се напијат кафе или Геле Ком- популарен пијалок во регионот.
„На здравје за љубовта“, вели Хансен наздравувајќи. Во нормални околности ќе се гушнеа и бакнеа. Но сега мора да одржуваат растојание.
Двајцата седат на различна страна од границата одделени со црвено-бела лента- на столчиња кои си ги понеле од дома. Се среќаваат секој ден на затворената граница кај преминот Авентофт.
Хансен живее во градчето Зидерлигум во регионот Северна Фризија, а Расмусен во данскиот град Галехус. Хансен на состанок доаѓа со својот електричен велосипед, а Расмусен со автомобил.
Инга и Карстен на гранично рандевуФотографија: picture-alliance/dpa/F. Molter
На 14 март, Данска ја затвори границата кон Германија. Два дена подоцна и Германија го стори истото.
„Тажно е, ама можеме да го промениме“, вели Расмусен. Двајцата редовно разговараат и на телефон, но и секојдневно се среќаваат. Се сретнале пред две години случајно, и оттогаш нема ден да не бидат заедно.
Се надеваат дека до Велигден ќе можат повторно да се посетуваат, а прават планови и за иднината. Кога ќе завршат ограничувањата, сакаат заедно да патуваат.
Љубов во време на коронавирус
Илјадници двојки низ цел свет склучија брачен сојуз без оглед на загриженоста поради коронавирусот. „Вооружени“ со заштитни маски, двојките ја запечатија љубовта на масовни свадби во Јужна Кореја и Филипини.
Фотографија: Reuters/H. Ran
Љубовта не прекинува
Среќна невеста и среќен зет ја слават својата романтична свадбена масовна церемонија во Гачиеонг, град во северниот дел од Јужна Кореја. Свадбата се одржа на 7 февруари, пред во земјата да бидат откриени масовни случаи на коронавирусот.
Фотографија: picture-alliance/AP/Ahn Young-joon
Бакнежи преку маски
220 двојки во филипинскиот град Баколод на 20 февруари се заколнаа на вечна љубов на масовна венчавка и се бакнаа, но преку маски. „Поинакво е чувството кога се бакнуваш со маска, но бакнежот е дел од церемонијата“, изјави младоженецот Џон Пол за австралиските медиуми.
Фотографија: Reuters/Bacolod City Public Information Office
Ден на вљубените во кризни времиња
Оваа невеста во филипинската престолнина Манила носи заштитна маска и чека да тргне кон олтарот на масовната свадбена церемонија која се одржа на 14 февруари, на Свети Валентин, омилен ден за масовни венчавки во земјата. На Филипини досега се регистрирани неколку случаи на заразени со коронавирус и има еден починат.
Фотографија: Imago Images/Zuma/L.M. David
Ах, љубов....
На масовна свадба во Јужна Кореја, според француската новинска агенција АФП, биле поделени 30.000 заштитни маски за лице на присутните двојки и нивните гости. Венчавката се одржала во Црквата на обединувањето, основана од Сун Мијунг Мун, кого следбениците го слават како месија.
Фотографија: AFP/Jung Yeon-je
Пресни младенци
Во Јужна Кореја беа откажани фестивали, прослави и концерти, зашто се стравуваше дека масовните собири ќе го поттикнат проширувањето на вирусите. Но пред љубовта, сите мерки капитулираа...
Фотографија: Reuters/H. Ran
Избор - дали да се носи маска или не
Заштитните маски беа делени на масовните свадби, но учесниците и гостите имаа право на избор дали ќе ги носат или не - некои се одлучија да не ги стават.
