Њујорк во трескавична потрага по медицинска опрема
БГ /АП
22 март 2020
Гувернерот на Њујорк Ендрју Куомо изјави дека државата трага ширум светот по медицинска опрема и бара привремени локации за болници околу градот Њујорк. Бројот на заразени се искачи на 11 илјади.
Властите во Њујорк се во потрага по медицинска опрема на сите страни на светот откако почна драматично да расте бројот на заразени во мегалополисот и ширум САД. Се бараат и локации за привремени болници за да се зголеми капацитетот од сегашните 50 илјади легла на 75 илјади. Во овој момент хоспитализирани се 1.600 луѓе. Сојузната агенција за вонредни состојби прогласи состојба на катастрофа со што отвори простор за милијарди долари дополнителна помош. Њујорк во моментов има 11 илјади заразени и 56 смртни случаи од коронавирусот.
Властите веќе идентификувале потреба од два милиони маски и направени се нарачки, а во болниците има недостаток и од болнички наметки, па се бара материјал за нивна изработка. Поради недостатокот на опрема, болниците ги рационализираат резервите и употребуваат користени маски.
Недостасуваат и респираторни машини, па се бара начин да се купат околу 6.000 кои би биле распоредени во критичните региони, а се истражува и дали една машина може да опслужува повеќе пациенти, вели гувернерот Куомо.
„Буквално пребаруваме низ целиот свет во потрага по медицинска опрема“, вели тој.
Во Њујорк веќе започнаа и експериментални терапии за Ковид-19 со хидроксихлорокин и Зитромакс. Хидроксихлорокинот е лек за маларија кој и претседателот Доналд Трамп го спомена како можно решение за коронавирусот, иако експертите се повнимателни во препораките. Неколку болници во Њујорк започнаа клинички тестови врз пациенти и со ремдесивир, антивирален лек, како и со сарилумаб, човечко антитело кое може да спречи развој на тешка пневмонија.
Каде сѐ демне коронавирусот?
Коронавирус насекаде! Можеби дури и на пиперките, билетот за возење, сопственото домашно милениче. Што воопшто смеам да допирам? Ова вознемирувачко прашање си го поставуваат многумина. Еве неколку смирувачки одговори:
Досега познатите коронавируси остануваат опасни на површини како кваките околу четири-пет денови. Како и другите инфекции преку капки и SARS-CoV-2 се пренесува преку рацете и површините кои се допираат често во текот на денот. Иако вирусот е нов и затоа е прилично непознат, експертите сметаат дека и за него важат многу резултати од истражувања на други, веќе познати коронавируси.
Затоа, треба да се биде претпазлив и кога се руча во кантината на работното место - доколку таа одамна не е веќе затворена. Коронавирусите во основа можат преку кивање или кашлање на инфицирано лице да завршат на приборот за јадење или чиниите. Германскиот институт за проценка на ризици (БфР) меѓутоа пишува дека „досега не се познати инфекции со SARS-CoV-2 кои се појавиле со ваков начин на пренос“
Фотографија: picture-alliance/dpa/J. Kalaene
Страв од увозна стока?
Дали родителите мора да се плашат од инфекција преку играчки од увоз? Не, велат од БфР. Досега нема случаи на инфицирани лица за кои е докажано дека се заразиле преку увезени играчки или друга стока. Експертите сметаат дека вирусите немаат голема стабилност при промена на животната средина. Предизвикувачот на болеста е опасен повеќе денови пред сѐ во услови на студ и голема влажност на воздухот.
Фотографија: picture-alliance/dpa/S. Gollnow
Пакети полни вируси
Коронавирусите кои го напаѓаат човекот не се особено стабилни на суви површини. Со оглед на тоа што стабилноста на вирусите надвор од човечкиот организам зависи од могу фактори, како темпертурата и влажноста на воздухот, БфР ја смета инфекцијата по пошта за „главно неверојатна“. Сепак, институтот признава дека сѐ уште не располага со точни податоци за SARS-CoV-2.
Фотографија: picture-alliance/dpa/M. Becker
Вирусен пинг-понг со домашното милениче?
Дали моето куче може да ме зарази мене или јас да го заразам него? Ризикот домашните миленичиња да се заразат од коронавирус е оценет како низок од страна на експертите. Но, тој не може сосема да се исклучи. Самите животни не покажуваат симптоми, значи не заболуваат. Но, доколку се инфицирани тие може преку својот здив, плунка, повраќање, урина да го пренесуваат вирусот.
Фотографија: picture-alliance/dpa/AP/A. Tarantino
Опасен зеленчук?
Пренесување на SARS-CoV-2 преку контаминирани прехранбени продукти, според БфР, не е веројатно. Досега нема докажани случаи на инфицирање на ваков начин. Темелно миење на рацете пред подготовка на оброкот, и во времиња пред и по коронавирусот, е нешто што се подразбира. Со оглед на тоа што вирусите се чувствителни на топлина, загревањето на намирниците натамошно го намалува ризикот од инфекција.
Досега познатите САРС и МЕРС коронавируси не сакаат топлина, но се прилично отпорни на студ. Тие може да останат опасни дури две години на температури од минус 20 степени Целзиусови. БфР меѓутоа смирува: досега нема укажувања за ланец на инфекции со SARS-CoV-2 преку конзумирање храна, вклучително и замрзнати продукти.
Избувнувањето на КОВИД-19 има и едно добро: Кина забрани храна од диви животни. Сѐ укажува на тоа дека новиот коронавирус врз човекот е пренесен од лилјаци. Лилјаците за тоа не се виновни, зашто веројатно завршиле во супа против своја волја. Но, борбата против SARS-CoV-2 ќе трае многу подолго и ќе биде потешка од ослободувањето од храна од диви животни.
