Ќе го издржи ли интернетот времето на коронавирусот?
Томас Колман
4 април 2020
Милиони луѓе работат од дома, видео-конференции се замена за состаноците во канцеларија. И, милиони луѓе седат дома и гледаат филмови и серии. Ќе издржи ли интернетот? Дојден ли е до своите граници?
Фотографија: picture-alliance/dpa/B. Roessler
Реклама
Швајцарската влада се заканува дека ќе го исклучи Нетфликс и други слични понудувачи. Најголемиот понудувач на интернет во земјата Свиском пред неколку дена предупреди дека мрежата ќе биде преоптоварена. Тоа е нуспојава на вирусот и мерките на изолација - сите се дома од каде работат или гледаат видео-содржини за разонода.
Загриженоста расте и во ЕУ. Комесарот за заеднички пазар Тјери Бретан бара од големите понудувачи да разгледаат како може да се заштеди проток на податоци. На тоа веќе реагираа Нетфликс и Јутјуб со тоа што го намалија квалитетот на сликата во Европа.
Јутјуб во наредните 30 денови дозволува гледање видеа само во стандарден квалитет (SD) наместо во висок (HD). Нетфликсза четвртина го намали количеството на податоци кое го пренесува, но не е преминат сосема на SD, туку го прилагодува квалитетот на моменталната оптовареност на локалната мрежа. Тоа значи дека некои претплатници на оваа платформа ќе забележат дека сликата е полоша, додека други нема да забележат ништо.
Подобар квалитет на сликата бара повеќе пиксели, а тоа значи повеќе податоци. Затоа HD овие денови станува луксуз.
Германија не е загрижена
Според пишувањето на медиумите, Франција веќе барала од Дизнида го одложи покренувањето на платформата Дизни+ , која од утре би требало да нуди содржини како Нетфликс.
Во Германија се’ уште нема такви грижи. Во Франкфурт се наоѓа еден од најголемите интернет-јазли во светот DE-CIX. Засега е регистрирано зголемено користење на интернетот за 10%, но тое се’ уште не е алармантно. Кога сите капацитети би биле искористени, брзината би паднала на 9,1 терабајти во секунда, вели Харалд Зума, шеф на управата на интернет-јазолот во Франкфурт.
„Овие 9,1 терабајти се најголемо оптоварување кое сега можеме да го имаме на мрежата, а во моментов протокот е 41 терабајти, што значи има уште многу простор“, вели тој.
Дека во Германија нема причини за загриженост вели и Доротеа Бер, која во Канцлерамтот е задолжена за дигитализација. „Дури и кога се’ би било вклучено, кога сите во Германија би работеле од дома и паралелно би гледале преку интернет фудбалско првенство, дури и тогаш ќе има доволно капацитети.“
Во DE-CIX во Франкфурт немаат податоци кои точно содржини се користат повеќе, но знаат дека користењето видеа е зголемено за 50%. Тоа не е резултат само на зголемено гледање филмови и серии, туку има и повеќе видео-конференции преку платформи како Скајп или Зум, Повеќе се играат и видео-игри.
„Гледаме дека луѓето сега порано почнуваат со користење интернет. Вообичаено врвот е помеѓу 20 и 21 часот, а сега почнува веќе во 10 часот. Гледаме дека однесувањето на луѓето на другиот крај на мрежата е значително променето“, вели Зума.
Тој додава и дека по зголеменото кроистење интернет се гледа кои области во светот се посебно силно погодени од епидемијата. На пример, во Мадрид сега се пренесуваат 60% повеќе податоци од вообичаено.
Кои фирми профитираат од коронавирусот
Стравот од коронавирусот тешко ги погодува финансиски пазари. Кога компаниите мора да ги коригираат своите прогнози за добивка и промет надолу, тоа е отров за курсот на акциите. Но, сепак има и такви кои профитираат.
Кога во последната недела од февруари курсот на акциите ширум светот драматично падна, акциите на платформата за видео стриминг успешно се спротиставија на трендот. Аналитичарите сметаат дека т.н. „останете дома“ акции , како оние на „Нетфликс“ можат да им обезбедат богатство на инвеститорите за време на појавата на коронавирусот, бидејќи на сѐ повеќе луѓе им се вели да останат дома.
Фотографија: picture-alliance/AA/M.E. Yildirim
„Откачете“ го фитнес-клубот
Акциите на фитнес старт-апот Пелотон Интерактив, кој произведува велосипеди за вежбање и, исто така, нуди фитнес часови преку интернет, скокнаа бидејќи стравот од коронавирусот може да поттикне многу фитнес ентузијасти да не одат во своите теретани и клубови и да се одлучат за понудите на Пелотон.
Шефот на фармацевската компанија „Модерна“, Стефан Банкелза кусо време стана милијардер откако компанијата испорача експериментална вакцина против коронавирусот за клиничко тестирање кај луѓето, со што се зголеми цената на нејзините акциите. И Лим Ви Чаи од Малезија, мнозински акционер во фирмата за медицински ракавици „Топ Глав“, влезе во клубот на милијардери среде избувнувањето на вирусот.
Останете дома, останете поврзани
Акциите на телеконференцискиот старт-ап „Зум Видео“ пораснаа речиси за 50% од февруари, откако инвеститорите проценија дека сѐ повеќе луѓе поради стравот од коронавирусот ќе работат од дома. Компанијата веќе придодаде повеќе активни корисници годинава - 2,22 милиони - отколку во целата 2019 година.
Фотографија: zoom.us
Празни полици во супермаркетите
Во супермаркетите, како германскиот „Реве“ и францускиот „Карфур“, прехранбените производи „летаат“ од полиците додека купувачите во паника ги зголемуваат домашните залихи. Затоа инвеститорите засилено вложуваат во акциите на компаниите за пакувана храна. И онлајн трговците, како Амазон, исто така, имаат поголема побарувачка, бидејќи купувачите поради страв од вирусот ги избегнуваат продавниците.
Произведувачите на маски за лице, дезинфекциски средства за раце и дезинфекциски марамчиња се сведоци на огромен раст на побарувачката, бидејќи купувачите бараат начини да се заштитат од вирусот кој брзо се шири. Фирмата „3M“, која меѓу останатото произведува и маски за лице, е една оние со најголема добивка.
Фотографија: picture-alliance/NurPhoto/Yichuan Cao
„Во секое време, насекаде“
Германската софтверска компанија „ТимВјуер“ која им овозможува на корисниците да работат од далечина (од дома), е сведок на голема побарувачка на нејзините услуги, особено во Кина, епицентарот на коронавирусот. На Франкфуртската берза цената на акциите на оваа компанија забележа огромен раст во изминатите неколку дена.
