Швајцарските фудбалски репрезентативци победата против екипата на Србија ја проследија со гестот - албански двоглав орел. Дали провокацијата ќе биде казнета, прашуваат весниците на германски јазик.
Фотографија: Getty Images/C. Rose
Реклама
Гранит Џака и Џердан Шаќири со своите гестови ги провоцираа српските гледачи. Тие ја подгреваат дискусијата во врска со швајцарската репрезентација, која се сметаше за завршена или барем ублажена, пишува Ноје цирхер цајтунг:
„Џердан Шаќири и Гранит Џака, двајцата најталентирани играчи на оваа генерација на швајцарскиот фудбал, со два гола натпреварот во Калининград го решија во корист на својот тим. Никој во оваа репрезентација не игра како нив. Но, нивната политичка сензибилност и општествената свест се неразвиени. Требаше да пуштат вечерва да зборува само фудбалот. Но, прославувајќи ги головите, тие зборуваа со своите раце, со култниот код кој српските гледачи на стадионот и на ТВ сигурно го сфатија за провокација. Џака и Шаќири покажаа со прсти двоглав албански орел, а тоа е националистички гест и тоа во натпревар кој ионака беше напнат и со предзнак на висок ризик. Србите и Албанците немаат добри односи, а фудбалерите тоа го знаат.
Двоглав орел- провокација на српските навивачиФотографија: REUTERS
Делегацијата на Швајцарија со денови елегантно ја избегнуваше темата, посебно тренерот Владимир Петковиќ, кој ги игнорираше сите политички нијанси. Неговите играчи на теренот требаше да се однесуваат како и тој. Но, гестовите не беа непромислени. Џака изјави дека така сакал да се заблагодари на сите луѓе кои го поддржувале. А само ја подгреја дискусијата за која сите сметаа дека е завршена. Во ноември 2014. година Советот на играчите на швајцарската репрезентација реши во иднина да постои воздржаност од такви гестови. Сега мора да се констатира: работата на сензибилизација во репрезентацијата немала траен ефект, иако вакви сигнали со раце извесен период немаше. Но, времињата уште се такви што на пример 'Велтвохе' пишува дека националниот тим на Швајцарија е 'трупа ветерани, странски платеници главно од Балкан, збогатена со неколку швајцаризирани Африканци.' Тоа звучи како провокација. Џака и Шаќири во Калининград можеа да одговорат попаментно, а не и самите да провоцираат,“заклучува Ноје цирхер цајтунг.
Шпигел онлајн пак пишува:
„Во текот на 52 минути од натпреварот, навивачите од Србија го исвиркуваа Гранит Џака. А потоа Швајцарецот целата фрустрација и бес ја истресе во долгата топка која доведе до израмнување на резултатот. Прославувајќи го голот, тој со рацете го прикажа албанскиот двоглав орел. Тоа беше сцена на вечерта, но не затоа што голот беше навистина убав, туку поради прилично мрачниот изглед на Џака, кој и на последниот гледач му даде на знаење дека ова е повеќе од игра, дека на оваа утакмица станува збор за нешто друго, а не само за бодови на Светското првенство. Сознанието на вечерта е: сѐ е политика. Швајцарските репрезентативци во Русија својата победа против Србија ја прославуваа со албански гест. Нејасно е дали оваа акција ќе има последици. Нормално е дека ФИФА не толерира политички пораки на стадион. Времињата се компликувани, барем како и табелата во групата Е“, пишува Шпигел онлајн.
Илустрирана историја на светските фудбалски првенства
Од германското „Чудо од Берн“, преку „Божјата рака“ на Марадона, до Зидановиот „Удар со глава 2006“. Историјата на светските фудбалски првенства е полна со незаборавни моменти. Вака ги гледа карикатуристот Херман Аксел.
Фотографија: Aczel / Edel Books
„Монтевидео, бог те видео!“
Првото Светско фудбалско првенство е одржано во Уругвај во 1930. Повеќето учесници беа од северна, централна и јужна Америка, а од Европа стигнаа само четири екипи, меѓу кои и југословенската. Во финалето домаќинот го победи вечниот ривал - Аргентина. Резултатот 4:2.
Фотографија: Aczel/Edel Books
Чудото во Берн
Првото СП по Втората светска војна беше одржано во 1954 година, во Швајцарија. Најсилна екипа беше репрезентацијата на Унгарија. Во првото коло „унгарската лесна коњица“ ја совлада Германија со 8:3. Но, Германците им се оддолжија во финалето (3:2) и првпат станаа светски рпваци. Фриц Валтер (лево) и легендарниот тренер Сеп Хербергер на рамената на навивачите.
Фотографија: Aczel/Edel Books
Само еднаш
Англија - „мајката на фудбалот“ - само еднаш во историјата на светските фудбалски првенства беше првак и тоа на домашен терен во 1966 година. Во финалето ја совлада Германија со резултат 4:2. И денес е спорен голот кој Англија го постигна во 101. минута. Боби Мур (на сликата со пехар в раце) и неговите соиграчи на Англија ѝ ја донесоа првата и засега единствена титула првак на светот.
Фотографија: Aczel/Edel Books
Бразилска самба
Бразил во 1970 година по третпат стана светски првак. Кралот на фудбалот - Пеле (на сликата) и неговите соиграчи беа магионичари на теренот во Мексико. Во финалето ја совладаа Италија со резултат 4:1. На шест натпревари на СП, Пеле постигна 19 голови. Првпат таа година сите натпревари се пренесувани на телевизија во боја.
Фотографија: Aczel/Edel Books
Бомбардер на нацијата
На СП кое во 1974 година првпат е одржано во Германија, имаше неколку премиери: „Кајзер Франц“ Бекенбауер против „кралот на тоталниот фудбал“ Кројф, Запад против Исток, нов пехар. Во финалето домаќинот играше против Кројфовата Холандија и Германија славеше со резултат 2:1. Победничкиот гол го постигна „бомбардерот на нацијата“ Герд Милер (во средина).
Фотографија: Aczel/Edel Books
Божја рака
Светското првенство во 1986. во Мексико ќе остане запаметено како шоу на аргентинската фудбалска ѕвезда Диего Марадона. Благодарение на неговата генијалност и лукавство, Аргентина по вторпат стана првак на светот. Самиот Марадона постигна убав, но според гол. На средбата против Англија, со помош на раката ја уфрли топката во голот. Марадона подоцна изјави дека тоа била „Божја рака“.
Фотографија: Aczel/Edel Books
Плукање
Во 1990. Германија во Италија ја прослави третата титула светски првак. „Панцерите“ (во превод - тенкови) во финалето ја победија Аргентина со 1:0. Првенството ќе остане запаметено по неспортското однесување на Холанѓанецот Франк Рајнкард (десно) кој го плукна Руди фелер во осминафиналето. Двајцата беа исклучени од игра. Германија победи со 2:1 и се реваншираше за поразот на ЕП од 1988 година.
Фотографија: Aczel/Edel Books
Зидановиот удар со глава
Во 2006 година повторно славеше Германија, која по изведувањето пенали како домаќин во финалето ја совлада Франција. Неславен момент на првенството беше кога капитенот на француската репрезентација Зидан со глава го удри Италијанецот Матераци. Исклучен е од натпреварот и тоа означи крај на неговата успешна фудбалска кариера.
Фотографија: Aczel/Edel Books
Конечно титула
На СП во Јужноафриканската Република доминираше Шпанија со својата „тика-така“ игра. Шпанците во финалето ја совладаа Холандија со резултат 1:0. Победничкиот гол го постигна Андреас Ињеста (број 6 на сликата). Германија во борбата за трето место го совлада Уругвај со резултат 3:2.
Фотографија: Aczel/Edel Books
Крал на дриблинзите
На СП во 2014 годинина Аргентина ја предводеше Лионел Меси. Неговите мајсторски дриблинзи ја доведоа Аргентина до финалето, каде што ја чекаше Германија, која претходно го совлада домаќинот Бразил со 7:1.
Фотографија: Aczel / Edel Books
Екипа со четири титули
Финалната средба на СП во 2014 година се одигра пред 75.000 гледачи на стадионот Маракана во Рио де Жанеиро. Германија ја победи Аргентина со резултат 1:0 и така стана прва европска репрезентација која освоила титула на американскиот континент. На сликата се играчите на германската репрезентација кои настапија во финалето.
Фотографија: Aczel / Edel Books
Низ светските првенства - со стрип
Издавачката куќа „Едел Букс“ по повод СП во Русија во продажба пушти илустрирана историја на светските фудбалски првенства под наслов „World Cup 1930-2018“. Незаборавните моменти од 84-годишната историја се претставени со многу хумор.
Фотографија: Aczel / Edel Books
Карикатуристот
Аргентинскиот уметник Херман Аксел (Germán Aczel) својата кариера ја почна во родниот Буенос Аирес, во кој, покрај останатото, работеше и за спортското списание „Ел Графико“. На 26-годишна возраст се досели во Германија и денес живее во Минхен. Во моментов работи за реномираниот англиски фудбалски магазин „FourFourTwo“.
