22,5 години затвор за полицаецот кој го уби Џорџ Флојд
ЖА / агенции
26 јуни 2021
Во Минеаполис е изречена казната за поранешниот полицаец Дерек Шовин, кој речиси девет минути со коленото го притискаше вратот на Џорџ Флојд, предизвикувајќи негова смрт.
Фотографија: STRF/STAR MAX/IP/picture alliance
Реклама
„Не можам да дишам“ („I can't breathe"): мачната смрт на Џорџ Флојд на 25 мај 2020 година предизвика меѓународен револт и шокираност. Точно 13 месеци по убиството на Афроамериканецот во Минеаполис, во американската сојузна држава Минесота, поранешниот полицацец Дерек Шовин ја дозна својата казна – 22 години и шест месеци затвор.
Американскиот претседател Џо Бајден изјави дека казната е соодветна, а адвокатот на Џорџ Флојд ја оцени како историска пресуда.
Обвинителството барше 30 години затвор за обвинетиот Шовин, додека неговата одбрана пледираше за условна затворска казна.
Солидарност со револтот во САД
01:27
This browser does not support the video element.
Пред објавувањето на висината на казната, браќата на убиениот Џорџ Флојд се обратија со емотивни зборови во судската сала во Минеаполис: „Што мислеше, што ти минуваше низ главата додека клечеше врз вратот на мојот брат?“, го праша Теренс Флојд осуденикот.
Мајката на Дерек Шовин во кусото обраќање го опиша својот син како „мирен, разумен и присебен човек“. Самиот Шовин на членовите на семејството на Флојд им изрази сочувство, надеж дека ќе најдат свој мир.
Во процес кој не само во САД, туку и во светот беше следен со големо внимание, поротата на 20 април го прогласи Дерек Шовин за виновен во сите точки од обвинението: убиство од втор степен. Екс-полицаецот, кој дотогаш се наоаѓаше на слобода со кауција, беше ставен во затвор. Во мај судијата претседавач Питер Кахил досуди четири отежнувачки околности: Шовин дејствувал со посебна свирепост, како полицаец ја злоупотребил позицијата на доверба и авторитет, делото го извршил пред очите на малолетници и во група со други службеници.
Покрај Шовин, обвинети се и тројца други полицајци за учество во смртта на Флојд. Александер Кенг, Томас Лејн и Тоу Тао се обвинети меѓу другото за соучесништво во убиство, а судскиот процес против нив, планиран за август, е одложен за март следната година.
Смртта на Џорџ Флојд, документирана со видео снимка, во САД предизвика масовни протести против расизам и полициско насилство против граѓаните со црна боја на кожата. На видеото се гледа како полицајците со колено го притискаат невооружениот човек на земјата. Шовин притоа со своето колено околу девет минути го стегаше вратот на Флојд, додека тој во повеќе наврати молеше за воздух. 46-годишниот Флојд беше пренесен во болница, каде е констатирана негова смрт. Полицајците го уапсиле под сомнение дека платил кутија цигари со фалсификувана банкнота од 20 долари.
Протести против колонијализмот и расизмот
Антирасистичките протести по смртта на Афроамериканецот Џорџ Флојд го подгреаја конфликтот околу колонијализмот. Во Европа и САД се оштетуваат, уништуваат и отстрануваат споменици.
Во изминатите години имаше повеќе конфликти околу статуата на Едвард Колстон во Бристол. Сега демонстрантите го извадија споменикот од неговиот постамент и го фрлија во пристаништето. Колстон работел за Кралско-африканската компанија, која поробувала 5000 луѓе годишно. Подоцна влегол во историјата како филантроп поради неговите донации за училишта и болници.
Активисти го обвинуваат иницијаторот на извидничкото движење Роберт Баден-Пауел за расизам, хомофобија и восхитување со Адолф Хитлер. Неговата статуа се наоѓаше во Браунси, во јужна Англија. По уништувањето на првите споменици во текот на антирасистичките протести, локалната власт во знак на претпазливост самата ја отстрани статуата на Баден-Пауелс.
Фотографија: picture-alliance/dpa/A. Matthews
Леополд Втори и белгискиот колонијален режим
Во Белгија има многу статуи на кралот Леополд Втори. Монархот кој владеел со земјата од 1865 до 1909 година, во Конго создал брутален колонијален режим, кој важи за еден од најнасилните во историјата. Повеќе статуи на Леополд Втори беа испрскани со боја. Оваа, во предградието на Антверпен, Екерен, беше транспортирана во музејскиот магацин од страна на властите.
Фотографија: Reuters/ATV
Кристофер Колумбо – помеѓу почит и презир
И во САД се разгоре судир околу спомениците на контроверзни личности. Гневот на демонстрантите е насочен, меѓу другото, против Кристофер Колумбо. Оваа статуа на морепловецот во Бостон, остана без глава. Домородците во северна Америка го отфрлаат оддавањето чест на Колумбо, поради тоа што велат дека неговите експедиции овозможиле колонизација на континентот и геноцид на индигените народи.
Фотографија: Reuters/B. Snyder
Контроверзно сеќавање: Статуа на Колумбо во Чиле
Колумбо за некои е една од најзначајните личности во светската историја, за многу луѓе во Латинска Америка, меѓутоа, неговото име се поврзува со почеток на ера на страдања. Од аспект на индигените народи, шпанскиот колонијализам е темно поглавје во нивната историја. И во Латинска Америка во минатото се уништувани и оштетувани статуи на Колумбо.
Фотографија: picture-alliance/dpa/B. Boensch
Џеферсон Дејвис во визир на демонстрантите
Џеферсон Дејвис бил претседател на Конфедеративните држави на Америка и еден од водечките политичари во Граѓанската војна. Статуата на Дејвис сега е испрскана со боја и откорната. Ненси Пелоси, спикер на Претставничкиот дом во САД, пледира за отстранување на статуите на претставниците на Конфедеративните држави. Овие луѓе застапувале „свирепост и варварство“, изјави демократката Пелоси.
Фотографија: Getty Images/C. Somodevilla
Роберт Ли ја подели Америка
И оваа статуа на Роберт Ли, генерал на конфедеративната армија во американската граѓанска војна, би требало да биде отстранета. Во Ричмонд, во американската сојузна држава Вирџинија, споменикот ќе биде отстранет по налог на гувернерот Ралф Нортам. Многу Афроамериканци во статуите на политичарите и војниците од Конфедеративните држави на Америка гледаат симболи на угнетување и ропство.
