„Освојување делови од Европа“ - според неколку извештаи, американските разузнавачки агенции предупредуваат за вистинските планови на Путин.
Најновиот разузнавачки извештај е од септември, изјави едно од шесте лица запознаени со проценките. Според изворот, наодите на САД се совпаѓаат со ставовите на европските влади. „Разузнавачките агенции отсекогаш претпоставувале дека Путин сака повеќе“, оцени демократскиот претставник Мајк Квигли од Комитетот за разузнавање на Претставничкиот дом. Овој став е во спротивност со мировните напори на американската администрација под републиканскиот претседател  Доналд Трамп,  кој  тврди дека Путин сака да ја заврши  војната.

Преговорите околу мировен план од 20 точки од името на  САД  ги водат зетот на Трамп, Џаред Кушнер, и специјалниот пратеник Стив Виткоф.  Територијалните прашања  остануваат централна спорна точка.  Русија моментално контролира околу 20 проценти од територијата на Украина. Додека Трамп наводно врши притисок врз владата во Киев да отстапи територија, според двајца инсајдери, украинскиот претседател  Володимир Зеленски  тоа го одбива. Планот, исто така, вклучува безбедносни гаранции за Украина. Тие опфаќаат  распоредување претежно европски безбедносни сили  во соседните земји и во Украина, како и воздушно набљудување поддржано од САД. Сепак, Зеленски неодамна изрази скептичност: „Има едно прашање на кое сè уште не добив одговор: Што всушност ќе постигнат овие безбедносни гаранции?“

Владимир Путин  во петокот не понуди компромиси, но на својата годишна прес-конференција изјави дека е подготвен за разговори. Меѓутоа, неговите услови ќе мора да бидат исполнети, рече тој, посочувајќи на неодамнешните воени успеси. Сомнежи за брз мировен договор постојат и во американската влада.

„Не знам дали Путин сака да склучи договор или да ја преземе целата земја. Тој го кажа тоа отворено“, изјави државниот секретар Марко Рубио на прес-конференција. „Знаеме што првично сакаа да постигнат кога започна војната. Но, тие не успеаја да ги постигнат тие цели.“