Патнички авион на компанијата „Ер Индија“ се урна во западна Индија, потврди Министерството за цивилно воздухопловство. Авионот се урнал над станбена област кратко по полетувањето од меѓународниот аеродром Ахмедабад во државата Гуџарат. На телевизиските снимки можеа да се видат остатоци од авионот во пламен и густ црн чад кој се издига кон небото во близина на аеродромот. Авионот од типот „Боинг 787-8 Дримлајнер“  бил на пат кон аеродромот „Лондон Гетвик“ во Велика Британија.

Полиција: Најмалку 244 луѓе во авионот

„Моментално ги истражуваме деталите и ќе дадеме дополнителни информации“, соопшти Ер Индија на социјалната мрежа X:

Според Индиската управа за цивилно воздухопловство, најмалку 232 патници и 12 членови на екипажот биле на летот AI171. На телевизиските снимки можеше да се види како спасувачите носат луѓе на носила и ги транспортираат со амбулантно возило до најблиските болници.

Последната тешка авионска несреќа во Индија се случи во 2010 година. Тогаш, при неуспешно слетување на авион на „Ер Индија“ на аеродромот во јужноиндискиот град Мангалор, загинаа 158 луѓе, а осум патници преживеаја.