За многу лошиот настап на првата дебата пред претседателските избори во ноември, Џозеф Бајден како причина го посочи заморот од патувањата, велејќи им на новинарите дека „не се покажал толку паметен“ затоа што „патувал низ светот неколкупати“ пред ТВ-дуелот.

„Не ги слушав моите соработници... и тогаш за малку ќе заспиев на сцената“, рече тој.

Од последното патување, 81-годишниот Бајден се врати на 15 јуни, речиси две недели пред дебатата на 27 јуни.

За време на предизборната дебата во студиото на Си-Ен-Ен во Атланта, гледајќи дека кандидатот на Демократската партија е во многу лоша состојба и дека губи катастрофално од Доналд Трамп, предизборниот штаб на Бајден брзо соопшти дека тој има „настинка“.

За време на ТВ-дуелот, Бајден зборуваше тивко, мрмореше, често беше нејасен, а неговите реченици беа некохерентни.

Многу поддржувачи на Демократската партија се загрижени дека Бајден, чија кандидатура треба да биде потврдена на партиската Конвенција во август, всушност не е способен - и психички и физички - не само да го победи Трамп, туку и да ја извршува должноста претседател на САД.

Тој одлучно негира и тврди дека со него се е во ред, но дека е уморен. Бајден сега вели дека патувањата и промените на временските зони му влијаеле.

„Јас не барам изговор и ова не е тоа, туку објаснување“, рече тој на приватна акција за собирање средства во Вирџинија во вторникот вечерта.

Тој им се извини на симпатизерите на Демократската партија за неговиот настап во дебатата и истакна дека е „од витална важност“ да победи во ноември.

Сепак, кај демократите расте стравот и вознемиреноста од пораз на ноемвриските избори, а во кулоарите се зборува дека на Конвенцијата на Демократската партија наместо Бајден може да се појави друг кандидат.

Еден од првите демократи што тоа јавно го кажа беше конгресменот Лојд Догет од Тексас.

„Се надевам дека (Бајден) ќе донесе болна и тешка одлука да се повлече“, рече Догет во вторникот.