"Бездомните кучиња од Македонија имаат подобар живот кога се вдомени надвор од нашите граници, дури некои од нив живеат подобар живот и од нас“, вели Наталија Малзаркова, од организацијата „Шепастите ентузијасти“ која пет години згрижува бездомни кучиња од Скопје. До сега спасиле 600 од улиците на градот, а 450 веќе имаат дом и живеат нов живот надвор од Македонија. 

„Бездомните кучиња од Скопје, ги вдомуваме надвор од нашите граници. Имаме вдомено во Шкотска, Англија, Ирска, Франција, Белгија, Италија, а дури и во Америка имаме вдомено едно куче.

Имаме три прекрасни девојки кои ни помагаат од Шкотска и кои го организираат и го прават тој процес да биде реалност, да можат сите тие кучиња да најдат дом, да им бараат дом на сите тие кучиња што ние ги спасуваме“, вели Наталија.