Според американската влада, околу 8.000 севернокорејски војници веќе пристигнале во рускиот пограничен регион Курск и се подготвени за борбени операции против украинските единици. „Проценуваме дека има приближно  10.000 севернокорејски војници во Русија,  а според последните информации, до 8.000 од овие севернокорејски сили се стационирани во регионот Курск“, изјави американскиот државен секретар Ентони Блинкен.

Иако американската влада сè уште не видела никакви борбени операции на Севернокорејците против украинските сили, „претпоставуваме дека тоа ќе се случи во следните неколку дена“, продолжи Блинкен. Русија ги обучувала севернокорејските војници за артилериски битки и основни пешадиски операции. Доколку навистина интервенираат во војната, тие би биле легитимни цели и би можеле да бидат на мета на Украинците.

Блинкен истакна дека тоа е прв пат во 100 години Русија да покани странски војници во својата земја. Не е јасно дали  севернокорејските војници  би можеле да бидат распоредени во борбени операции на украинска територија или да се борат во областите окупирани од Украина во Русија. Според дипломатите на ОН, можно е и Севернокорејците да бидат распоредени зад фронтот и таму, на пример, да преземат логистички задачи.

Јужнокорејското разузнавање претходно објави дека севернокорејските војници во Русија носат руски униформи и дека им биле дадени лажни идентитети за да го сокријат нивното вистинско потекло. Рускиот претседател Владимир Путин не го негира присуството на севернокорејски војници и истакнува дека Украина се потпира и на персонал од земјите на НАТО.

Пред неколку дена,  генералниот секретар на НАТО Марк Руте  ја опиша воената соработка меѓу  Русија и Северна Кореја  како „закана за Индо-пацифичката и евроатлантската безбедност“.