Високиот кинески претставник за надворешна политика Ванг Ји и американскиот државен секретар Антони Блинкен утрината се сретнаа во Пекинг, на вториот и последен ден од официјалната посета на Блинкен на Кина.

Ванг во хиерархијата на моќ е над кинескиот министер за надворешни работи Чин Ганг. Блинкен е првиот американски државен секретар кој ја посетил Кина од 2018 година, пристигнувајќи во услови на зголемени тензии меѓу ривалските сили.

Во неделата, Блинкен разговараше со Чин седум и пол часа - многу подолго од планираното. За време на нивниот состанок, Блинкен повтори дека САД ја следат „визијата за свет кој е слободен, отворен и поддржува меѓународен поредок заснован на правила“.

Американскиот државен секретар го покани кинескиот министер за надворешни работи во Вашингтон, а двете страни изјавија дека разговорите биле искрени и конструктивни.

Постојат шпекулации дека Блинкен би можел да се сретне со кинескиот претседател Ши Џинпинг подоцна денеска, но засега нема потврда од Пекинг. Доколку се одржи средбата, тоа би бил значеан сигнал за натамошниот тек на односите меѓу двете суперсили. 

За време на неговата прва посета на Кина како највисок американски дипломат, Блинкен се осврна на низа спорни прашања, како и областите во кои Пекинг и Вашингтон би можеле да соработуваат, соопшти американскиот Стејт департмент.

Односите меѓ САД и Кина се сметаат за едни од најважните билатерални односи во светот.

Тие врски се сериозно нарушени поради низа прашања, како што се поддршката на Кина за руската војна во Украина, заканите на Пекинг кон Тајван и тековните трговски спорови во областите како што се напредните компјутерски чипови.

.