Во два напада во Колумбија, најмалку 18 лица загинаа, а повеќе од 50 се повредени. На северот од земјата, полициски хеликоптер е соборен од дрон. Притоа се убиени дванаесет полицајци, според зборовите на гувернерот на провинцијата Антиокија, Андрес Хулијан. Тројца полицајци во рурална област сè уште чекаат спасување, напиша тој на платформата X.

Кусо потоа, две експлозивни направи детонираа во близина на воздухопловната база во големиот град Кали, на југозападот од Колумбија. Шест лица загинаа во нападот, а повеќе од 50 се повредени, објави градската администрација.

Хеликоптер соборен за време на операција против дрога

За време на операцијата против дрога, два хеликоптери во департманот Антиокија прво слетаа полицајци задолжени да уништат полиња со кока во руралниот регион. Според извештајот во весникот Ел Тиемпо, полицајците биле нападнати, по што хеликоптерите се свртеле. Еден хеликоптер бил нападнат од дрон и се срушил. Министерот за одбрана Педро Санчез изјави на платформата X дека, според најновите информации од полицијата, герилската организација ЕМС стои зад инцидентот. ЕМС се одвои од ФАРК откако групата го положи оружјето во мировен договор со владата во 2016 година. ЕМС го отфрла мировниот договор. 

Претседателот Густаво Петро отпатува во Кали за да учествува на состанок на Советот за безбедност, кој е составен од членови на владата, безбедносни сили и локални власти. Тој, исто така, ја обвини фракцијата на ФАРК за нападот врз воздухопловната база.

Колумбија: 65 проценти од светската површина за одгледување кока

Колумбија е најголемиот производител на кокаин во светот. Според Обединетите нации, земјата со над 250.000 хектари поседува околу 65 проценти од светската површина за одгледување кока. Високо профитабилниот бизнис со дрога го поттикнува насилството во оваа јужноамериканска земја, која веќе има крвава историја.

Левичарските бунтовници, десничарските паравоени сили и армијата водеа граѓанска војна 52 години. 220.000 луѓе загинаа, а милиони се раселени. Иако безбедносната ситуација се подобри по мировниот договор од 2016 година меѓу владата и тогаш најголемата бунтовничка група ФАРК, делови од земјата и натаму ги контролираат нелегални групи.