Во ЕУ во иднина ќе биде забрането плаќањето во готово над 10.000 евра. Преговарачите на Европскиот парламент и на земјите членки денеска (18.01.) се усогласија околу  поостри мерки против перењето пари,  со кои се затвораат дупките во националните законодавства. Трговците со луксузни стоки во иднина мора да го проверуваат идентитетот на своите муштерии и да ги пријавуваат кај властите сомнителните бизниси.

Заострената регулатива ќе важи посебно за трговијата со скапоцени камења, луксузни автомобили, приватни авиони и бродови. На удар на новите законски прописи, според усогласувањето, ќе се најдат и финансиски силните фудбалски здруженија, како ФЦ Баерн Минхен или Борусија Дортмунд – професионалниот фудбал со неговите инвестиции од милијарди од трети држави се смета за можна влезна врата за  перењето пари во Европа.

Властите засилено во визир ќе ги имаат и криптовалутите, како и банкарските зделки на супер богатите со имот од најмалку 50 милиони евра. Сопствениците на претпријатија со удел од најмалку една четвртина низ цела ЕУ ќе треба да бидат регистрирани. На тој начин меѓу другото треба да се спречи руските олигарси да ги заобиколуваат воведените санкции поради руската агресорска војна во Украина.

Со новите правила се хармонизира регулативата во цела ЕУ и се затвораат дупките кои  криминалците ги користат за перење нелегални пари  и финансирање на терористички активности. 

Законот ќе треба да го одобрат Европскиот парламент и земјите-членки на ЕУ. Надгледувањето на новите правила ќе биде во надлежност на националните служби, со координација од нова европска служба против перењето пари, чие седиште ќе биде договорено оваа година. Германија претендира тоа да биде во Франкфурт.