Во Судан продолжуваат жестоките борби меѓу вооружените сили на земјата и паравоените трупи. Борбите во главниот град Картум продолжија во текот на целата среда, напишаа очевидци на Твитер. Доцна вечерта можеше да се слушне и артилериски оган во главниот град, јавија светските новински агенции Претходно, надежта за прекин на огнот меѓу конфликтните страни повторно беше уништена.

Светската здравствена организација соопшти дека околу 300 луѓе загинаа, а повеќе од 3.000 се повредени во вооружените судири меѓу суданската армија и паравоените сили за брза поддршка (РСФ).

„Ситуацијата во Судан е се позагрижувачка. „296 луѓе досега загинаа, а над 3.000 се повредени“, изјави генералниот директор на СЗО, Тедрос Аданом Гебрејесус.

Тој изјави дека недостатокот на безбеден пристап, електрична енергија, храна, вода, персонал и намалениот медицински материјал го оневозможуваат функционирањето на многу здравствени установи во ситуации кога имаат илјадници повредени луѓе на кои им е потребна итна помош.

Тој го повтори својот повик до сите страни да го послушаат повикот за хуманитарна пауза, која, како што рече, ќе им овозможи на заробените во борбите да бараат засолниште.

„Цивилите, исто така, би можеле да имаат пристап до храна, вода и лекови, а пациентите би можеле да бараат здравствена заштита што им е потребна во паузата“, рече Гебрејесус.

Тој рече дека мирот е единственото решение.

Жестоките борби меѓу суданската армија и РСФ продолжија во средата во близина на претседателската палата во Картум.

Додека РСФ ја обвинува армијата дека ги напаѓа нејзините сили јужно од Картум со лесно и тешко оружје, армијата тврди дека паравоените сили „шират лаги“ и ги прогласи за „бунтовничка“ група.