Книгата „Црно семе“ на Ташко Георгиевски ќе биде задолжителна лектира за средношколците, откако веќе четири години не е дел од наставната програма,најпрво во шест средни училишта, а од лани оваа одлука почнала да се применува и во стручните училишта. Станува збор заодлука донесена во рамките на наставната програма за општообразовниот наставен предмет „Македонски јазик и литература“ за четиригодишното стручно образование, донесена од страна на министерот за образование и наука во 2019 година, велат од Бирото за развој на образованието, по реакциите дека во наставните програми прсти има вмешано „Преспанскиот договор“. 

Неименувани професори по македонски јазик, преку дел од медиумите „изразија сомнеж дека со тоа што романот „Црно семе“ на Ташко Георгиевски и драмата „Црнила“ на Коле Чашуле од септември не се веќе дел од програмата во средното стручно образование, станува збор за бришење на овие дела од списокот за лектири во склад со Преспанскиот договор и Договорот за добрососедство со Бугарија“. Во „Црно семе“ се раскажува за голготата на Македонците од Егејска Македонија, а во „Црнила“ за Македонците во Бугарија.

Но, од Бирото за развој на образованието (БРО) велат дека било постапено согласно реформите во стручното образование. Новата наставна програма во која што е изоставено „Црно семе“ започнала да се реализира во учебната 2021/22 година во шест средни училишта, а од учебната 2022/23 година во сите средни стручни училишта. 

„Така, делото „Црно семе“ не е содржано во наставната програма уште од 2019 година. Тоа е планирано и поместено во лектирниот список, којшто се изедначува со лектирниот список за учениците од гимназиско образование“, велат од БЈО. 

Застапени повеќе автори од современата литература 

Останатите поместувања во наставната програма, според надлежните, се направени врз анализа и потреба во новата наставна програма да се внесат дела и на други етаблирани автори кои се дел од македоската современа литература создавана во последните две децении. Па така, учениците во четврта година се среќаваат со дела од современата литература и во неа се застепени македонските автори Дуковски, Насев, Чашуле, Стефановски, но во планот не се наведени делата кои мора да се изучуваат. 

„Со оглед на тоа што одредени дела (како што е „Црно семе“) третираат историски прашања, тие се обработуваат како задолжителни четива, во рамки на часовите предвидени за обработка на лектири“, велат од Бирото за развој на образованието.

Како да се усогласи интересот на децата со новото време? 

Тие се децидни дека комисиите за изработка на наставните програми, составени од универзитетски професори, наставници и советници од Бирото за развој на образованието - стручно, професионално и посветено одговараат на предизвиците со кои се соочуваат во развојот на наставните програми усогласувајќи ги со интересот на учениците на „новото време“, како и со потребните компетенции коишто треба да ги стекнат учениците изучувајќи го македонскиот јазик и литература. 

Бирото за развој на образованието е отворено за соработка и за разјаснување на сите прашања што се поставуваат и за кои е заинтересирана јавноста, дури тие за првпат да се јавуваат по четири години од воведување на наставна програма  и по голем број дискусии и обуки на наставниот кадар, велат од БРО.