Парламентот на Црна Гора по маратонска седница, рано утрината ја собори владата на чело со лидерот на движењето УРА, Дритан Абазовиќ. Од вкупно 80 пратеници во паралментарниот состав за недоверба на владата гласаа 50, а против беше еден пратеник. Во гласањето за недоверба не учествуваа пратениците на партиите Демократски фронт, листата „Црно на бело“, Социјалистичката народна партија и пратеникот од Демос, Миодраг Лекиќ.

„Многу работи во Црна Гора се појасни... Со државата ќе владеат или криминалци или граѓани, ние сме на страната на граѓаните“, рече Абазовиќ по гласањето.

Тој додаде дека неговата влада „најкусо траела, но донела најтешки одлуки“. Абазовиќ ѝ „честиташе“, како што рече, на новата коалиција на претседателот на Црна Гора, Мило Ѓукановиќ, и лидерот на Демократите, Алекса Бечиќ.

Премиерот во заминување рече и оти нема да учествува во наредната влада која ќе се формира пред изборите.

Иницијативата за недоверба на владата ја поднесоа Демократската партија на социјалистите, Социјалдемократската партија, Социјалдемократите, Либералната партија и Демократската унија на Албанците.

Иницијативата беше поднесена по потпишувањето на Темелниот договор со Српската православна црква-СПЦ.

За време на расправата во парламентот, претседателот на Владата, Дритан Абазовиќ, рече дека дошле до пишана иницијатива за реконструкција на Владата, која ја потпишале 9 пратеници од листата „Црно на бело“ и Социјалистичката народна партија. Меѓутоа, оваа иницијатива не ја поддржале Демократите.

Абазовиќ на чело на владата застана на 28 април, со поддршка на партијата на Мило Ѓукановиќ, по гласањето за недоверба на владата на Здравко Кривокапиќ, која дојде на власт по бранот литии против Законот за слобода на вероисповед.